EPFO కొత్త రూల్స్.. ఇకపై మీ పీఎఫ్ డబ్బులు నేరుగా మీ బ్యాంక్ అకౌంట్‌కు.. సింపుల్ ప్రాసెస్!

ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) తన కోట్లాది మంది సభ్యులకు భారీ ఊరటనిచ్చే నిర్ణయం తీసుకుంది. సాధారణంగా పీఎఫ్ డబ్బులు విత్‌డ్రా చేయాలంటే రోజుల తరబడి వేచి చూడాల్సి వచ్చేది. కానీ ఇకపై ఆ అవసరం లేదు. మే 2026 చివరి నాటికి పీఎఫ్ (EPFO withdraw) ప్రక్రియను యూపీఐ (UPI) ద్వారా పూర్తి చేసే సరికొత్త సదుపాయాన్ని తీసుకురాబోతోంది.

ఏమిటి ఈ 'CITES 2.0' డిజిటల్ ప్లాట్‌ఫారమ్?

EPFO ఇప్పుడు మరింత ఆధునిక సాంకేతికతను సంతరించుకుంటోంది. 'CITES 2.0' అనే కొత్త డిజిటల్ సిస్టమ్ ద్వారా పీఎఫ్ ప్రక్రియను వేగవంతం చేయనున్నారు. గత ఏడాది దాదాపు 6.4 కోట్ల క్లెయిమ్‌లను ఈ సంస్థ సెటిల్ చేసింది. ప్రస్తుతం ఉన్న 7.9 కోట్ల మంది సభ్యులలో సుమారు 7.7 కోట్ల మందికి కేవైసీ (KYC) వివరాలు ఇప్పటికే అప్‌డేట్ అయి ఉన్నాయి. ఈ కొత్త సిస్టమ్ వల్ల పేపర్ వర్క్ తగ్గి, ఎటువంటి జాప్యం లేకుండా నేరుగా డబ్బులు అందుతాయి.

యూపీఐ ద్వారా విత్‌డ్రా ఎలా చేయాలి?

ఈ కొత్త విధానం అందుబాటులోకి వచ్చాక ప్రాసెస్ చాలా సరళంగా మారుతుంది..

1. సభ్యులు తమ UAN నంబర్‌తో EPFO పోర్టల్ లేదా యాప్‌లోకి లాగిన్ అవ్వాలి.
2. ఆధార్ ఆధారిత OTP ద్వారా వెరిఫికేషన్ పూర్తి చేయాలి.
3. మీరు ఎంత మొత్తం విత్‌డ్రా చేయాలనుకుంటున్నారో ఎంటర్ చేసి, మీ UPI ID ని ఇవ్వాలి.
4. వెరిఫికేషన్ పూర్తయిన నిమిషాల్లోనే మీ పీఎఫ్ డబ్బులు నేరుగా మీ బ్యాంక్ ఖాతాకు వచ్చి చేరతాయి.

ఎంత డబ్బు తీసుకోవచ్చు?

కొత్త నిబంధనల ప్రకారం, ఉద్యోగులు తమ మొత్తం పీఎఫ్ బ్యాలెన్స్‌లో గరిష్టంగా 75 శాతం వరకు మాత్రమే విత్‌డ్రా చేసుకోవడానికి అనుమతి ఉంటుంది. మిగిలిన 25 శాతం సొమ్మును రిటైర్మెంట్ అవసరాల కోసం అకౌంట్‌లోనే ఉంచాలని ప్రభుత్వం నిర్ణయించింది. దీనివల్ల అత్యవసర సమయంలో డబ్బు అందడంతో పాటు, భవిష్యత్తు కోసం కూడా కొంత పొదుపు మిగిలి ఉంటుంది.

ప్రభుత్వ లక్ష్యం ఏమిటి?

ఈ మార్పు వెనుక ప్రభుత్వం రెండు ప్రధాన ఉద్దేశాలను కలిగి ఉంది. మొదటిది, అత్యవసర సమయాల్లో (Emergency) ఉద్యోగులకు తక్షణమే ఆర్థిక సహాయం అందడం. రెండోది, మొత్తం సొమ్మును ఒకేసారి తీసేయకుండా నిరోధించి, పదవీ విరమణ తర్వాత ఆర్థిక భద్రతను కల్పించడం. అంతేకాకుండా 'EPF స్కీమ్ 2026', 'EPS 2026' వంటి కొత్త సంస్కరణలు కూడా త్వరలోనే రాబోతున్నాయి, ఇవి పెన్షన్ , ఇన్సూరెన్స్ నియమాలను మరింత పటిష్టం చేస్తాయి.

ఇకపై పీఎఫ్ ఆఫీసుల చుట్టూ తిరగాల్సిన పని లేకుండా, క్లెయిమ్ రిజెక్ట్ అవుతుందనే భయం లేకుండా కేవలం మీ స్మార్ట్‌ఫోన్ ద్వారానే పీఎఫ్ (EPFO withdraw) చేసుకోవచ్చు. ఇది నిజంగా సామాన్య ఉద్యోగులకు లభించిన గొప్ప డిజిటల్ వరం!