EPFO సరికొత్త విప్లవం! ఇకపై కంపెనీ చుట్టూ తిరిగే పని లేకుండానే పనులు ఖతం! ఎలాగంటే..

ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) తన కోట్లాది మంది సభ్యుల కోసం విప్లవాత్మక మార్పులను తీసుకొచ్చింది. గతంలో పీఎఫ్ పనుల కోసం కంపెనీ (యజమాని) చుట్టూ తిరగాల్సి వచ్చేది. కానీ, ఇప్పుడు 'ఫేస్ అథెంటికేషన్ టెక్నాలజీ' (FAT) ద్వారా పీఎఫ్ సేవలను మరింత వేగంగా, పారదర్శకంగా మార్చింది. ఈ కొత్త టెక్నాలజీతో మీ పీఎఫ్ అకౌంట్‌ను మీరే కంట్రోల్ చేయవచ్చు.

ఏమిటీ పీఎఫ్ ఫేస్-ఐడీ (Face-ID)?

సాధారణంగా ఒక ఉద్యోగికి కొత్తగా పీఎఫ్ అకౌంట్ ఓపెన్ చేయాలంటే యూనివర్సల్ అకౌంట్ నంబర్ (UAN) జనరేట్ చేయడం కోసం యజమానిపై ఆధారపడాల్సి వచ్చేది. ఆ తర్వాత దానిని యాక్టివేట్ చేసుకోవడం మరో పెద్ద ప్రాసెస్. ఈ తలనొప్పిని వదిలించుకోవడానికి EPFO.. గతంలోనే ఫేస్ అథెంటికేషన్ టెక్నాలజీని ప్రవేశపెట్టింది. అయితే దీని గురించి చాలామందికి తెలియదు.

ఈ ఫీచర్ ద్వారా సభ్యులు తమ ముఖాన్ని స్కాన్ చేయడం ద్వారా (Face Recognition) సొంతంగా UANను జనరేట్ చేసుకోవచ్చు, వెంటనే యాక్టివేట్ కూడా చేసుకోవచ్చు. దీనివల్ల పొరపాట్లు జరగవు. పైగా భద్రత కూడా పెరుగుతుంది.

ఈ మార్పు ఎందుకు అవసరమైంది?

గతంలో పీఎఫ్ సభ్యులు ఎదుర్కొన్న ప్రధాన సమస్యలు ఇవే..

• యజమానిపై ఆధారపడటం: UAN జనరేషన్ కోసం కంపెనీ అనుమతి తప్పనిసరిగా ఉండేది.
• తప్పుడు వివరాలు: పేరు, పుట్టిన తేదీ వంటి వ్యక్తిగత వివరాలు తప్పుగా నమోదైతే వాటిని సరిచేయడం నరకంలా ఉండేది.
• క్లెయిమ్ ఆలస్యం: వివరాలు సరిగ్గా లేకపోవడం వల్ల డబ్బు విత్‌డ్రా చేయడం లేదా ట్రాన్స్‌ఫర్ చేయడం చాలా కష్టమయ్యేది.

ఫేస్-ఐడీ తెచ్చిన మార్పు (Impact)..

2025 చివరి నాటికి ఈ కొత్త టెక్నాలజీ అద్భుతమైన ఫలితాలను ఇచ్చింది..

• దాదాపు 50 లక్షల కొత్త UAN లు ఈ ఫేస్ అథెంటికేషన్ ద్వారానే జనరేట్ అయ్యాయి.
• సుమారు 32 లక్షల ప్రొఫైల్ కరెక్షన్లు (పేరు, డేట్ ఆఫ్ బర్త్ మార్పులు) ఆన్‌లైన్‌ లో సులభంగా పూర్తయ్యాయి.

EPFO లో ఇతర కీలక సంస్కరణలు..

కేవలం ఫేస్-ఐడీ మాత్రమే కాదు, మరికొన్ని అదిరిపోయే మార్పులను కూడా EPFO తీసుకొచ్చింది..

• ఆటోమేటిక్ ట్రాన్స్‌ఫర్: మీరు ఉద్యోగం మారినప్పుడు, పాత కంపెనీ నుంచి కొత్త కంపెనీకి పీఎఫ్ అకౌంట్ ఇప్పుడు ఆటోమేటిక్‌ గా బదిలీ అవుతుంది. మీరు లేదా మీ యజమాని ఏమీ చేయనక్కర్లేదు.
• అడ్వాన్స్ విత్‌డ్రా: ఆరోగ్యం, పెళ్లి, ఇల్లు లేదా చదువు కోసం మీ పీఎఫ్ బ్యాలెన్స్‌లో 75% వరకు (గరిష్టంగా రూ. 5 లక్షల వరకు) సులభంగా విత్‌డ్రా చేసుకోవచ్చు.
• మ్యాన్యువల్ పని లేదు: ఇప్పుడు సగానికి పైగా పీఎఫ్ క్లెయిమ్‌ లు ఎవరి ప్రమేయం లేకుండా కంప్యూటర్ల ద్వారా ఆటోమేటిక్‌గా సెటిల్ అవుతున్నాయి.
• బ్యాంక్ వెరిఫికేషన్: బ్యాంక్ అకౌంట్ మార్చుకోవడానికి ఇప్పుడు యజమాని అప్రూవల్ అవసరం లేదు.
• పాస్‌బుక్ లైట్: మీ పీఎఫ్ బ్యాలెన్స్‌ ను ఎప్పుడైనా చూసుకోవడానికి సభ్యుల పోర్టల్‌ లో 'పాస్‌బుక్ లైట్' సౌకర్యం అందుబాటులో ఉంది.
• డిజిటల్ లైఫ్ సర్టిఫికేట్: పెన్షనర్లు ఇంటి నుంచే డిజిటల్ లైఫ్ సర్టిఫికేట్ సమర్పించవచ్చు. దీనికి ఇండియా పోస్ట్ పేమెంట్స్ బ్యాంక్ సహకారం అందిస్తుంది.

మొత్తానికి EPFO తీసుకొచ్చిన ఈ డిజిటల్ సంస్కరణలు సామాన్య ఉద్యోగులకు పెను ఊరటనిస్తున్నాయి. ఇకపై మీ పీఎఫ్ అకౌంట్ మీ చేతుల్లోనే ఉంటుంది. ఒకవేళ మీరు ఇంకా మీ UAN ని యాక్టివేట్ చేసుకోకపోతే, వెంటనే ఈ ఫేస్ ఐడి టెక్నాలజీని ఉపయోగించి పూర్తి చేసుకోండి!