అధిక పెన్షన్ దరఖాస్తుకు మరోసారి గడువు పెంపు.. EPF సభ్యులూ త్వరపడండి మరి..!

PF: అధిక పెన్షన్ ఎంచుకునేందుకు దరఖాస్తు గడువును రిటైర్‌మెంట్ ఫండ్ బాడీ EPFO మరోసారి పొడిగించింది. గతంలో మే 3 నుంచి జూన్ 26 వరకు సమయం ఇవ్వగా.. ఇప్పుడు జూలై 11 వరకు అవకాశం కల్పించింది. ఇలా జరగడం ఇది రెండోసారి కావడంతో, మరోదఫా పొడిగింపు ఉండకపోవచ్చని భావిస్తున్నారు.

అర్హులైన పింఛనుదారులకు ఏవైనా ఇబ్బందులు ఎదురైతే వాటిని పరిష్కరించుకునేందుకు 15 రోజుల పాటు చివరి అవకాశం ఇస్తున్నట్లు ఎంప్లాయీస్ ప్రావిడెంట్ ఫండ్ ఆర్గనైజేషన్ ఒక ప్రకటనలో తెలిపింది. దీని ప్రకారం ఉద్యోగులు ఆప్షన్/జాయింట్ ఆప్షన్‌ల ధ్రువీకరణ కోసం దరఖాస్తుల సమర్పణకు కొత్త చివరి తేదీని జూలై 11, 2023గా నిర్ణయించింది.

KYC అప్‌డేషన్‌లో సమస్య కారణంగా ఆప్షన్/జాయింట్ ఆప్షన్ ధ్రువీకరణలో ఇబ్బంది తలెత్తితే ఏమి చేయాలో PF సంస్థ వెల్లడించింది. అర్హతగల బాధిత పెన్షనర్ పరిష్కారం కోసం వెంటనే EPFIGMSలో ఫిర్యాదు చేయవచ్చని తెలిపింది. అనంతరం కంప్లైంట్‌కు సంబంధించి రికార్డు నమోదవుతుందని ప్రకటించింది.