PF పెన్షనర్లకు గుడ్ న్యూస్: నెలకు రూ. 3,000 పెన్షన్? కేంద్రం కీలక నిర్ణయం దిశగా అడుగులు!

ప్రైవేట్ రంగంలో రిటైర్ అయిన లక్షలాది మంది ఉద్యోగులు ప్రస్తుతం ఎంప్లాయీస్ పెన్షన్ స్కీమ్ (EPS) పరిధిలో వచ్చే మార్పుల కోసం ఎంతో ఆసక్తిగా ఎదురుచూస్తున్నారు. ప్రస్తుతం ఈ పథకం కింద పెన్షనర్లకు అందుతున్న కనిష్ట పెన్షన్ కేవలం రూ. 1,000 మాత్రమే. అయితే, దీనిని రూ. 3,000 వరకు పెంచాలని ప్రభుత్వం యోచిస్తున్నట్లు వార్తలు వస్తున్నాయి. దీనిపై ఇంకా అధికారిక ప్రకటన రానప్పటికీ, అంచనాలు మాత్రం భారీగా ఉన్నాయి. పెరుగుతున్న నిత్యావసర ధరలు, వైద్య ఖర్చుల దృష్ట్యా ఈ పెంపు తమకు ఎంతో ఆసరాగా ఉంటుందని రిటైర్డ్ ఉద్యోగులు ఆశాభావం వ్యక్తం చేస్తున్నారు.

పెన్షన్ పెంపు ఎందుకు అవసరం?

నేటి కాలంలో నెలకు రూ. 1,000 తో జీవించడం అనేది సామాన్యులకు అసాధ్యంగా మారింది. ఆహారం, మందులు, ఇంటి అద్దెలు విపరీతంగా పెరిగిపోయాయి. దీంతో పెన్షనర్ల సంఘాలు గత కొంతకాలంగా కనిష్ట పెన్షన్‌ను పెంచాలని ప్రభుత్వాన్ని డిమాండ్ చేస్తున్నాయి. ఈ నేపథ్యంలో పెన్షన్‌ను రూ. 1,500 నుండి రూ. 3,000 వరకు వివిధ దశల్లో పెంచే ప్రతిపాదనలు పరిశీలనలో ఉన్నట్లు తెలుస్తోంది.
EPS కనిష్ట పెన్షన్ అంటే ఏమిటి?
ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) నిర్వహించే ఈ పథకం కింద, ప్రైవేట్ ఉద్యోగులు రిటైర్ అయిన తర్వాత నెలవారీ పెన్షన్ పొందుతారు. ఒక ఉద్యోగి తన సర్వీస్ కాలంలో పీఎఫ్ ఖాతాకు జమ చేసే మొత్తంలో ఒక భాగం ఈ పెన్షన్ ఫండ్‌కు వెళ్తుంది. ప్రస్తుతం ఒక వ్యక్తికి నెలకు కనీసం రూ. 1,000 పెన్షన్ అందేలా ప్రభుత్వం గ్యారెంటీ ఇస్తోంది.

ఎవరు అర్హులు?

EPS పెన్షన్ పొందాలంటే ఈ క్రింది నిబంధనలు పాటించాలి..

• కనీసం 10 సంవత్సరాల సర్వీస్ పూర్తి చేసి ఉండాలి.
• ఉద్యోగంలో ఉన్నప్పుడు పీఎఫ్ కంట్రిబ్యూషన్ (EPFO ద్వారా) చేసి ఉండాలి.
• ప్రస్తుత రూల్స్ ప్రకారం రూ. 15,000 వేతన పరిమితి ఆధారంగా పెన్షన్ లెక్కిస్తారు.
• 10 ఏళ్ల కంటే తక్కువ సర్వీస్ ఉన్నవారు నెలవారీ పెన్షన్‌కు అర్హులు కారు, వారు కేవలం లంప్సమ్ అమౌంట్ విత్‌డ్రా చేసుకోవచ్చు.

పెన్షన్ లెక్కింపు ఎలా ఉంటుంది?

మీకు వచ్చే పెన్షన్ అనేది మీరు పనిచేసిన సంవత్సరాలు , మీ సగటు జీతం మీద ఆధారపడి ఉంటుంది. గత 60 నెలల సగటు జీతాన్ని తీసుకుని, దానిని మొత్తం సర్వీస్ ఏళ్లతో గుణించి, 70 తో భాగిస్తే మీ పెన్షన్ ఎంత అనేది తెలుస్తుంది. ఒకవేళ మీరు 20 ఏళ్ల కంటే ఎక్కువ సర్వీస్ పూర్తి చేస్తే, అదనంగా రెండు ఏళ్ల వెయిటేజీ బోనస్‌గా లభిస్తుంది. ఉదాహరణకు, రూ. 15,000 గరిష్ట వేతన పరిమితితో 10 ఏళ్లు పనిచేసిన వారికి సుమారు రూ. 2,143 వరకు పెన్షన్ వచ్చే అవకాశం ఉంది.

ప్రస్తుతానికి పెన్షన్ పెంపుపై ప్రభుత్వం నుండి తుది నిర్ణయం రావాల్సి ఉంది. ఒకవేళ రూ. 3,000 కి పెంపు జరిగితే, అది దేశవ్యాప్తంగా ఉన్న లక్షలాది మంది ప్రైవేట్ ఉద్యోగుల కుటుంబాల్లో కొత్త వెలుగులు నింపుతుంది. బడ్జెట్ లేదా ఇతర కీలక సమావేశాల్లో దీనిపై స్పష్టత వచ్చే అవకాశం ఉందని నిపుణులు అంచనా వేస్తున్నారు.