EPFO పెన్షన్ రూల్స్: 15 ఏళ్ల తర్వాత పూర్తి పెన్షన్ తిరిగి పొందే అవకాశం!

ప్రభుత్వ ఉద్యోగ విరమణ చేసిన తర్వాత చాలామందికి నెలవారీ పెన్షన్ వస్తుందన్న సంగతి తెలిసిందే. అయితే రిటైర్మెంట్ సమయంలో పిల్లల పెళ్లిళ్లకో, ఇల్లు కట్టుకోవడానికో లేదా పాత అప్పులు తీర్చడానికో ఒకేసారి పెద్ద మొత్తంలో డబ్బు అవసరమవుతుంది. అటువంటి వారి కోసం EPFO .. 'కమ్యూటేషన్ ఆఫ్ పెన్షన్' (Commutation of Pension) అనే అద్భుతమైన సదుపాయాన్ని అందిస్తోంది. ఈ రూల్ గురించి సరైన అవగాహన ఉంటే రిటైర్మెంట్ సమయంలో లక్షల రూపాయలు పొందడమే కాకుండా, 15 ఏళ్ల తర్వాత మళ్ళీ మీ పూర్తి పెన్షన్‌ను తిరిగి పొందవచ్చు.

కమ్యూటెడ్ పెన్షన్ అంటే ఏమిటి?

సరళంగా చెప్పాలంటే మీ భవిష్యత్తులో వచ్చే నెలవారీ పెన్షన్‌లో కొంత భాగాన్ని ముందే ఒకేసారి (Lump sum) తీసుకోవడాన్ని కమ్యూటేషన్ అంటారు. ప్రభుత్వ నిబంధనల ప్రకారం.. ఒక ఉద్యోగి తన ప్రాథమిక పెన్షన్‌లో గరిష్టంగా 40 శాతం వరకు ఇలా ముందే తీసుకోవచ్చు. ఉదాహరణకు, ఒక ఉద్యోగికి నెలకు రూ.20,000 పెన్షన్ రావాల్సి ఉండి, అందులో 40 శాతం కమ్యూట్ చేస్తే.. అతనికి రిటైర్మెంట్ సమయంలో ఒకేసారి భారీ మొత్తం అందుతుంది. అయితే ఆ తర్వాత ప్రతి నెలా వచ్చే పెన్షన్‌లో కొంత మొత్తం కోత పడుతుంది.

15 ఏళ్ల నిబంధన ఏమిటి?

చాలామంది పెన్షనర్లు తమ పెన్షన్‌లో కోత పడుతుంటే జీవితాంతం అలాగే ఉంటుందని ఆందోళన చెందుతుంటారు. కానీ, సీసీఎస్ (పెన్షన్ కమ్యూటేషన్) రూల్స్ 1981లోని రూల్ 10A ప్రకారం.. ఈ పెన్షన్ తగ్గింపు కేవలం 15 ఏళ్ల వరకు మాత్రమే ఉంటుంది. ప్రభుత్వం మీకు ముందే ఇచ్చిన నగదును 15 ఏళ్లలో మీ పెన్షన్ నుండి రికవరీ చేసుకుంటుంది. ఈ కాలం పూర్తయిన మరుసటి నెల నుండే మీకు మళ్ళీ పూర్తి పెన్షన్ అందడం ప్రారంభమవుతుంది.

ఆటోమేటిక్ గా పెన్షన్ పునరుద్ధరణ

ఈ రూల్‌లో ఉన్న గొప్ప విషయం ఏమిటంటే 15 ఏళ్ల తర్వాత పూర్తి పెన్షన్ పొందడానికి మీరు ఎటువంటి ప్రత్యేక దరఖాస్తు (Application) చేసుకోవాల్సిన అవసరం లేదు. మీ పెన్షన్ అందించే బ్యాంక్ లేదా సంస్థ ఆటోమేటిక్ గానే ఈ మార్పును చేస్తుంది. అయితే, పెన్షనర్లు తమ బ్యాంక్ రికార్డులను క్రమం తప్పకుండా చెక్ చేసుకోవడం మంచిది. ప్రస్తుతం ఉద్యోగ సంఘాలు ఈ 15 ఏళ్ల కాలాన్ని 12 ఏళ్లకు తగ్గించాలని కోరుతున్నప్పటికీ, ప్రభుత్వం ఇంకా దీనిపై ఎటువంటి అధికారిక నిర్ణయం తీసుకోలేదు. కాబట్టి ప్రస్తుతానికి 15 ఏళ్ల నిబంధనే అమల్లో ఉంది.

రిటైర్మెంట్ ప్లాన్ చేసుకునే వారు ఈ కమ్యూటేషన్ సదుపాయాన్ని వాడుకోవడం ద్వారా ఆర్థిక ఇబ్బందుల నుండి బయటపడవచ్చు. అయితే ఇది తీసుకునే ముందు మీ నెలవారీ ఖర్చులను దృష్టిలో ఉంచుకుని నిర్ణయం తీసుకోవడం ఉత్తమం.