PF News: సూపర్ వడ్డీ రేటు ప్రకటించిన ఈపీఎఫ్ఓ.. ఆనందంలో పీఎఫ్ చందాదారులు..

EPFO News: దేశవ్యాప్తంగా ప్రభుత్వ ప్రైవేటు రంగాల్లోని ఉద్యోగుల భద్రతకోసం నిర్థేశించబడిన ఈపీఎఫ్ చందదారులకు ట్రస్ట్ శుభవార్త ప్రకటించింది. ఈ క్రమంలో 2023-24 ఆర్థిక సంవత్సరానికి ప్రకటించబడిన వడ్డీ రేట్లను ఇప్పుడు గమనిద్దాం.

ఉద్యోగుల భవిష్య నిధి సంస్థ ప్రతి ఏటా మాదిరిగానే ఈసారి కూడా తన వడ్డీ రేట్లను ప్రకటించింది. 2023-24 ఆర్థిక సంవత్సరానికి ఉద్యోగులు దాచుకుంటున్న మెుత్తంపై 8.25 శాతం వడ్డీని చెల్లించాలని నిర్ణయించింది. దీనికి సంబంధించిన వివరాలను పీటీఐ వార్తా సంస్థ శనివారం ప్రకటించింది.

మార్చి 2023లో ఈపీఎఫ్ఓ అంతకు ముందు ఉన్న వడ్డీ రేటు 8.10 శాతం నుంచి స్వల్పంగా 8.15 శాతానికి పెంచిన సంగతి తెలిసిందే. వాస్తవానికి మార్చి 2022లో EPFO ​​2021-22కి పీఎఫ్ చందాదారులు దాచుకునే డబ్బుపై వడ్డీని 2020-21లో 8.5 శాతం నుంచి ఆరు కోట్ల మంది సబ్‌స్క్రైబర్‌ల కోసం నాలుగు దశాబ్దాల కనిష్ఠమైన 8.1 శాతానికి తగ్గించటం గతంలో చాలా మందిని నిరుత్సాహానికి గురిచేసింది. వాస్తవానికి 1977-78లో 8 శాతంగా ఉన్న వడ్డీ రేటు తర్వాత అతి తక్కువ రేటు మోదీ ప్రభుత్వ హయాంలో ప్రకటించబడింది.

తాజా వడ్డీ రేట్లలో మార్పులను ప్రకటించిన 6 నెలల తర్వాత రానున్న కాలంలో 6 కోట్ల మంది లబ్ధిదారుల ఖాతాల్లోకి ఈ సొమ్ము జమకానుంది. మార్చి 2020లో EPFO ​​ప్రావిడెంట్ ఫండ్ డిపాజిట్లపై వడ్డీ రేటును 2018-19కి అందించిన 8.65 శాతం నుంచి 2019-20కి ఏడేళ్ల కనిష్ఠ స్థాయి 8.5 శాతానికి తగ్గించిన సంగతి తెలిసిందే.