EPFO: భారీ లేఆఫ్స్‌లోనూ సత్తా చాటుతున్న ఇండియన్ జాబ్ మార్కెట్.. ఒక్క మార్చిలోనే..

EPFO: మార్చిలో నికర ప్రాతిపదికన 13.40 లక్షల మంది సభ్యులు చేరినట్లు రిటైర్‌మెంట్ ఫండ్ బాడీ EPFO ​​ప్రకటించింది. వీరిలో సుమారు 7.8 లక్షల మంది మొదటిసారిగా EPFO పరిధిలోనికి వచ్చినట్లు కార్మిక మంత్రిత్వ శాఖ తెలిపింది. తాజాగా విడుదల చేసిన పేరోల్ డేటా ప్రకారం.. 2021-22లో నికర ప్రాతిపదికన మొత్తం 1.22 కోట్ల మంది సభ్యులు ఉన్నారు. 2022-23లో వీరి సంఖ్య 1.39 కోట్లకు వెళ్లింది.

"గత ఆర్థిక సంవత్సరం 2021-22తో పోలిస్తే 2022-23లో 1.39 కోట్ల మంది EPFOలో చేరారు. అంటే అంతకు ముందు ఏడాదితో పోలిస్తే 13.22 శాతం పెరుగుదల నమోదైంది. కొత్తగా చేరిన సభ్యులలో అత్యధికంగా 18-21 సంవత్సరాల వయస్సు ఉన్నవారే ఉన్నారు. ఈ విభాగానికి చెందిన వారి సంఖ్య 2.35 లక్షలు. 22-25 ఏళ్లు గలవారు 1.94 లక్షల మంది సభ్యులు. ఇక 18-25 సంవత్సరాల వారిని పరిగణలోనికి తీసుకుంటే మొత్తం కొత్త వారిలో ఏకంగా 56.60 శాతం" అని కార్మిక శాఖ వెల్లడించింది.

దేశంలోని వ్యవస్థీకృత రంగం వర్క్‌ ఫోర్స్‌ లో చేరిన మెజారిటీ సభ్యులు మొదటిసారి ఉద్యోగం సాధించినవారేనని డేటా సూచిస్తోంది. వీరితో పాటు దాదాపు 10.09 లక్షల మంది EPFOలో తిరిగి చేరారని గణాంకాలు చెబుతున్నాయి. వీరు తమ ఉద్యోగాలను మార్చుకుని, తిరిగి EPFO ​​కింద రిజిస్టర్ కాబడిన మరో కంపెనీలో తిరిగి చేరారు. వారు తుది సెటిల్‌మెంట్ కోసం దరఖాస్తు చేయడానికి బదులుగా PF బ్యాలెన్స్‌ ను బదిలీ చేయాలని ఎంచుకున్నారు.

లింగం వారీగా విశ్లేషణను చూస్తే మార్చి 2023లో నికర మహిళా సభ్యుల నమోదు 2.57 లక్షలుగా ఉంది. అంటే సభ్యుల చేరికలో దాదాపు 19.21 శాతం వీరి వాటా. అందులోనూ 1.91 లక్షల మంది మహిళలు కొత్తగా EPFO కిందకు వచ్చినవారు. హర్యానా, ఉత్తరాఖండ్, ఉత్తరప్రదేశ్, హిమాచల్ ప్రదేశ్, జమ్మూ మరియు కాశ్మీర్ రాష్ట్రాల్లో నెలవారీగా కొత్త వారి జాయినింగ్ ట్రెండ్ పెరుగుతున్నట్లు తెలుస్తోంది. మహారాష్ట్ర 20.63 శాతం నికర చేరికలతో ముందంజలో ఉండగా, తమిళనాడు 10.83 శాతంతో రెండో స్థానంలో కొనసాగుతున్నాయి.