డేటాను అందించకుంటే ట్విట్టర్ డీల్‌ను విరమించుకుంటాం: మస్క్

టెస్లా అధినేత ఎలాన్ మస్క్‌కు ఇచ్చిన గడువు ముగిసిందని మూడు రోజుల క్రితం మైక్రో బ్లాగింగ్ సైట్ ట్విట్టర్ షాకిచ్చిన విషయం తెలిసిందే. తాజాగా ఎలాన్ మస్క్ మరో ఝలక్ ఇచ్చారు. మొన్న డీల్ ముగిసిందని, డీల్ గడువు ముగిసిందని ట్విట్టర్ పేర్కొనగా, ఇప్పుడు మస్క్ ప్రతిగా ఆయనే డీల్ నుండి బయటకు వెళ్తామని వ్యాఖ్యానించారు.

ట్విట్టర్‌కు సంబంధించిన పూర్తి డేటాను, ఫేక్ డేటాను తనకు ఇవ్వాలని లేదంటే44 బిలియన్ డాలర్ల డీల్ నుండి తప్పుకుంటామని చెప్పారు. ఈ మేరకు సోమవారం కంపెనీకి ఎలాన్ మస్క్ లేఖ రాశారు. స్పామ్, ఫేక్ అకౌంట్స్ డేటాను తమకు ఇవ్వాల్సిందే అన్నారు. విలీన ఒప్పందం ప్రకారం ట్విట్టర్ తన బాధ్యతలపై పారదర్శకంగా ఉండాలని, కానీ అందుకు నిరాకరిస్తుందని మస్క్ విశ్వసిస్తున్నారని అంటున్నారు.

కాగా, దాదాపు 44 బిలియన్ డాలర్లతో ట్విట్టర్‌ను కొనుగోలు చేయాలని మస్క్ భావించారు. ఈ మేరకు ఒప్పందం కూడా జరిగింది. ఆరు నెలల్లో ట్విట్టర్ ఎలాన్ మస్క్ చేతికి వెళ్లాలి. కానీ ఫేక్ అకౌంట్స్ అంశంపై సమాచారం ఇవ్వాలని మస్క్ డిమాండ్ చేస్తున్నారు. ఈ అభ్యర్థనను ట్విట్టర్ తిరస్కరించింది. దీంతో ఈ డీల్‌ను తాత్కాలికంగా హోల్డ్‌లో ఉంచారు.