ట్విట్టర్‌లో 9.2% వాటాను కొనుగోలు చేసిన ఎలాన్ మస్క్, ఆసక్తికర ట్వీట్

టెస్లా అధినేత ఎలాన్ మస్క్ సామాజిక అనుసంధాన వేదిక ట్విట్టర్‌లో 3 బిలియన్ డాలర్ల వ్యాల్యూ కలిగిన 9.2 శాతం ఈక్విటీ వాటాను కొనుగోలు చేశారు. ఇందుకు ఆయన ఓపెన్ మార్కెట్ నుండి 7.35 కోట్ల ట్విట్టర్ షేర్లను కొనుగోలు చేశారు. దీర్ఘకాలిక పెట్టుబడి లాభాల కోసం ఈ షేర్లు కొనుగోలు చేశారు. ఎలాన్ మస్క్ కొనుగోలు తర్వాత ట్విట్టర్ షేర్లకు డిమాండ్ పెరిగింది. సోమవారం మార్కెట్ ప్రారంభానికి ముందే ట్విట్టర్ షేర్ 26 శాతం లాభాల్లో ట్రేడ్ అయింది. భావవ్యక్తీకరణ స్వేచ్ఛకు సమస్యలు ఏర్పడుతున్నాయని ట్వీట్ చేసిన కొద్ది రోజులకే మస్క్ ట్విట్టర్ ఈక్విటీలో వాటా కొనుగోలు చేయడం గమనార్హం.

ట్విట్టర్‌లో వాక్‌స్వాతంత్ర్యంపై ప్రశ్నలు పెరుగుతున్నాయని కొత్త సామాజిక మాద్యమాన్ని సృష్టించే విషయంలో తీవ్రంగా ఆలోచిస్తున్నట్లు గతంలో ఎలాన్ మస్క్ పేర్కొన్నారు. దీంతో ట్విట్టర్‌కు పోటీగా మరో సోషల్ మీడియా అనుసంధాన వేదికను తీసుకు వస్తారని అందరూ భావించారు. కానీ ఆయన అదే ట్విట్టర్‌లో పెట్టుబడులు పెట్టారు. ఏప్రిల్ 1న ట్విట్టర్ షేర్ 40 డాలర్ల లోపు ఉంది. నాలుగో తేదీన ఏకంగా 50 డాలర్లకు చేరువైంది.

ఎలాన్ మస్క్ ఏప్రిల్ 4వ తేదీన మరో ప్రశ్నను ట్విట్టరిటీల ముందు ఉంచారు. ఎడిట్ బటన్ ఉండాలా? అని మస్క్ ట్వీట్ చేశారు. ఎలాన్ మస్క్ ట్వీట్‌పై ట్విట్టర్ సీఈవో పరాగ్ అగర్వాల్ స్పందించారు. ఈ పోల్ పరిణామాలు చాలా ముఖ్యమైనవని, చాలా జాగ్రత్తగా ఓటు వేయాలని ట్వీట్ చేశారు.