ట్రంప్ ఖాతాను పునరుద్ధరిస్తామన్న మస్క్, కానీ డొనాల్డ్ 'నో'!

టెస్లా అధినేత ఎలాన్ మస్క్ తాజాగా అమెరికా మాజీ అధ్యక్షులు డొనాల్డ్ ట్రంప్ ట్విట్టర్ బ్యాన్ అంశంపై స్పందించారు. ట్విట్టర్ కొనుగోలు ప్రక్రియ పూర్తయితే ట్రంప్ సోషల్ మీడియా ఖాతాను పునరుద్ధరిస్తామని మస్క్ అన్నారు. ఈ మేరకు మంగళవారం ఓ కార్యక్రమంలో ఆయన మాట్లాడారు. ఎలాన్ మస్క్ ట్విట్టర్‌ను వశం చేసుకున్న విషయం తెలిసిందే. ట్విట్టర్ కొనుగోలు చేసిన విషయం తెలిసినప్పటి నుండే ట్రంప్ ఖాతాను పునరుద్ధరిస్తారని ప్రచారం సాగింది. ఇందుకు అనుగుణంగా మస్క్ తాజాగా స్పందించారు.

ట్వీట్ల తొలగింపు, ఖాతాలను శాశ్వతంగా నిషేధించే విషయంలో ట్విట్టర్ చాలా జాగ్రత్తగా వ్యవహరించాలని గతంలో ఎలాన్ మస్క్ అన్నారు. 2021లో క్యాపిటల్ హిల్ పైన దాడి సందర్భంగా ట్రంప్ ఖాతా పైన ట్విట్టర్ పర్మినెంట్ నిషేధం విధించింది. దీనిపై మస్క్ తాజాగా స్పందించారు. పూర్తి నిషేధం తప్పిదమన్నారు. ట్విట్టర్ సహ వ్యవస్థాపకులు జాక్ డోర్సే కూడా ఇదే అభిప్రాయం వ్యక్తం చేశారని తెలిపారు.

తమ ఇద్దరి ఆలోచన ప్రకారం శాశ్వత నిషేధం సరికాదని మస్క్ అన్నారు. ఆ తర్వాత జాక్ డోర్సే కూడా స్పందించారు. ఎలాన్ మస్క్ అభిప్రాయాలతో తాను ఏకీభవిస్తున్నానని పేర్కొన్నారు. అయితే ట్విట్టర్ తన ఖాతాను పునరుద్ధరించినా అందులో చేరే ప్రసక్తి లేదని ట్రంప్ ఇటీవల తేల్చి చెప్పారు. తాను ప్రారంభించిన టూత్ సోషల్ పైన దృష్టి సారిస్తానన్నారు.