ట్విట్టర్‌కు ఎలాన్ మస్క్ అదిరిపోయే ఆఫర్: నా ఆఫర్ వద్దంటే...

సోషల్ మీడియా దిగ్గజం ట్విట్టర్‌కు టెస్లా సీఈవో, స్పేస్ ఎక్స్ అధినేత ఎలాన్ మస్క్ భారీ ఆఫర్ ఇచ్చారు. ఇటీవల వాటాల కొనుగోలుతో వాటాదారుగా మారిన మస్క్ ఏకంగా కంపెనీ కొనుగోలుకు ముందుకు వచ్చారు. కంపెనీకి చెందిన ఒక్కో షేరును 54.20 డాలర్ల చొప్పున కొనుగోలు చేయడానికి సంసిద్ధత వ్యక్తం చేశారు. కంపెనీకి చెందిన ఒక్కో షేరును 54.20 డాలర్ల చొప్పున కొనుగోలు చేయడానికి ఆసక్తి వ్యక్తం చేశారు.

అమెరికా సెక్యూరిటీస్ అండ్ ఎక్స్చేంజ్ కమిషన్‌కు సమర్పించిన రెగ్యులేటరీ ఫైలింగ్‌లో మస్క్ ఈ విషయాన్ని వెల్లడించారు. మొత్తం 41 బిలియన్ డాలర్లతో మిగిలిన షేర్లు కొనుగోలు చేయడానికి ముందుకు వచ్చారు. ఏప్రిల్ 1వ తేదీతో ముగిసిన ట్రేడింగ్‌లో ట్విట్టర్ షేర్ వ్యాల్యూతో పోలిస్తే ఇది 38 శాతం అధికం. ఎలాన్ మస్క్ ఆఫర్‌తో ప్రీ-మార్కెట్ ట్రేడింగ్‌లో ట్విట్టర్ షేర్లు పరుగు పెట్టాయి.

ప్రపంచవ్యాప్తంగా అభిప్రాయాన్ని స్వేచ్ఛగా వెల్లడించే వేదికగా మారిందనే ఉద్దేశ్యంతో ట్విట్టర్‌లో ఇటీవల పెట్టుబడులు పెట్టానని, కానీ ప్రస్తుత తరహాలో పని చేయడం వల్ల అది సాధ్యం కాదని, అందుకే ఓ ప్రయివేటు కంపెనీ తరహాలో ట్విట్టర్ పని చేయాల్సి ఉందని, ఇందుకు కొన్ని మార్పులు అవసరమన్నారు. ఈ మేరకు ట్విట్టర్ చైర్మన్ బ్రెట్ టేలర్‌కు లేఖ రాశారు. ఇది బెస్ట్ ఆఫర్ అలాగే ఫైనల్ ఆఫర్ అని చెప్పారు. తన వాటాను ఆమోదించని పక్షంలో వాటా విషయంలో పునరాలోచన చేయాల్సి ఉంటుందన్నారు. ట్విట్టర్‌లో మస్క్ 9.2 శాతం వాటాను కొనుగోలు చేశారు.