ప్రపంచంలోనే మొట్టమొదటి ట్రిలియనీర్‌గా ఎలాన్ మస్క్.. ఆ డబ్బుతో ఏమేం కొనచ్చో తెలుసా?

టెక్నాలజీ ప్రపంచంలో సరికొత్త రికార్డులను తిరగరాయడం ఎలాన్ మస్క్‌ కు అలవాటే. అయితే ఈసారి ఆయన ఏకంగా బిలియనీర్ల క్లబ్‌ను దాటేసి, ఇప్పటివరకు భూమిపై ఎవరికీ సాధ్యంకాని రేంజ్‌కు చేరుకున్నారు. అవును, ఎలాన్ మస్క్ ఇప్పుడు ప్రపంచంలోనే మొట్టమొదటి "ట్రిలియనీర్" (Trillionaire) గా అవతరించారు. ఆయన అంతరిక్ష పరిశోధనా సంస్థ 'స్పేస్ ఎక్స్' (SpaceX) స్టాక్ మార్కెట్లోకి రికార్డ్ స్థాయిలో అడుగుపెట్టడంతో మస్క్ ఆస్తి విలువ ఒక్కసారిగా పెరిగిపోయింది. ఫోర్బ్స్ (Forbes) అంచనాల ప్రకారం.. ప్రస్తుతం ఎలాన్ మస్క్ నికర ఆస్తి విలువ ఏకంగా 1.1 ట్రిలియన్ డాలర్ల (సుమారు రూ.92 లక్షల కోట్లకు పైగా) కు పైగా చేరింది.

అసలు ట్రిలియన్ డాలర్లు అంటే ఎంత?

సాధారణంగా ఒక మిలియన్, బిలియన్ అంటేనే మనకు చాలా పెద్ద నంబర్లుగా అనిపిస్తాయి. మరి ట్రిలియన్ అంటే ఎంతంటే.. ఒక మిలియన్ మిలియన్ల డాలర్లు అని అర్థం. అంటే ఒక బిలియన్ కంటే 1,000 రెట్లు పెద్దది. ఒకవేళ ఈ ఒక ట్రిలియన్ డాలర్లను ఒక రూపాయి లేదా ఒక డాలర్ నోట్ల రూపంలో మార్చి, ఒకదాని పక్కన ఒకటి పేర్చుకుంటూ పోతే.. భూమి నుండి చంద్రుడికి వెళ్లి మళ్లీ వెనక్కి 200 సార్లకు పైగా ప్రయాణించవచ్చు. అంతెందుకు, భూమి నుండి సూర్యుడికి ఉన్న దూరం కంటే కూడా ఈ నోట్ల పొడవు చాలా ఎక్కువ అవుతుంది.

అనేక దేశాల కంటే మస్క్ ఆస్తే పెద్దది!

ఇంటర్నేషనల్ మానిటరీ ఫండ్ (IMF) నివేదికల ప్రకారం.. ప్రపంచవ్యాప్తంగా కేవలం 20 దేశాల ఆర్థిక వ్యవస్థ (GDP) మాత్రమే ఒక ట్రిలియన్ డాలర్ల కంటే ఎక్కువగా ఉంది. స్వీడన్, సింగపూర్, ఐర్లాండ్, , మస్క్ పుట్టిన దేశమైన సౌతాఫ్రికా వంటి దేశాల వార్షిక ఆదాయం మొత్తం కలిపినా.. ఇప్పుడు మస్క్ వ్యక్తిగత ఆస్తి కంటే తక్కువే అంటే నమ్మగలరా? ప్రపంచంలోనే అతిపెద్ద ఫైనాన్షియల్ హబ్ అయిన న్యూయార్క్‌లోని మన్‌హట్టన్ మొత్తం ఏడాదికి చేసే ఉత్పత్తి కూడా దాదాపు ఒక ట్రిలియన్ డాలర్లే ఉంటుంది.

టాప్ బిలియనీర్లంతా కలిసినా ఆయన తర్వాతే!

ఈ అద్భుతమైన మైలురాయితో తోటి బిలియనీర్లకు, ఎలన్ మస్క్ (elon musk) కు మధ్య చాలా పెద్ద గ్యాప్ వచ్చేసింది. అమెజాన్ జెఫ్ బెజోస్, గూగుల్ కో-ఫౌండర్లు లారీ పేజ్, సెర్గీ బ్రిన్, ఒరాకిల్ లారీ ఎల్లిసన్.. వీరందరి ఆస్తులను కలిపినా కూడా కేవలం 1.05 ట్రిలియన్ డాలర్లు మాత్రమే అవుతుంది. అంటే ప్రపంచంలోని నలుగురు టాప్ కుబేరుల మొత్తం ఆస్తి కంటే మస్క్ ఒక్కడి ఆస్తి

విలువనే ఎక్కువ. ఏమేం కొనొచ్చు?

ఒక ట్రిలియన్ డాలర్ల అపరిమితమైన సంపదతో ఏమేం కొనవచ్చో ఊహించడం కూడా కష్టమే. ప్రస్తుతం అమెరికాలో ఒక సాధారణ ఇంటి సగటు ధర సుమారు 4 లక్షల డాలర్లు (దాదాపు రూ.3.3 కోట్లు) గా ఉంది. ఈ లెక్కన మస్క్ తన ఆస్తితో ఏకంగా 25 లక్షల ఇళ్లను కొనుగోలు చేయవచ్చు. అంతేకాదు, అమెరికాలోనే నాల్గవ అతిపెద్ద నగరమైన 'హ్యూస్టన్' (Houston) లో ఉన్న మొత్తం రియల్ ఎస్టేట్ ప్రాపర్టీల విలువ కంటే కూడా మస్క్ ఆస్తే ఎక్కువ. విలాసవంతమైన విమానాలు, లగ్జరీ కార్లు, ప్రైవేట్ దీవుల గురించి ప్రత్యేకంగా చెప్పక్కర్లేదు.. ప్రపంచంలోని ప్రతి పెద్ద బ్రాండ్‌ను, క్రీడా జట్లను అవలీలగా సొంతం చేసుకోగల ఆర్థిక శక్తి ఇప్పుడు ఆయన సొంతం.

ఇంత డబ్బు నిజంగా బ్యాంక్‌లో ఉంటుందా?

ఇంత భారీ నంబర్లు చూసి చాలా మంది మస్క్ అకౌంట్‌లో అంత క్యాష్ ఉందేమో అనుకుంటారు. కానీ అది నిజం కాదు. ఆయన ఆస్తిలో ఎక్కువ భాగం టెస్లా (Tesla), స్పేస్ ఎక్స్ (SpaceX) కంపెనీల షేర్ల రూపంలో పేపర్ మీదే ఉంటుంది. కాబట్టి షేర్ మార్కెట్ హెచ్చుతగ్గులను బట్టి ఈ ఆస్తి విలువ మారుతూ ఉంటుంది. ఏదేమైనా ఆర్టిఫిషియల్ ఇంటెలిజెన్స్ (AI), అంతరిక్ష పరిశోధనలు, ఎలక్ట్రిక్ వాహనాల రంగాన్ని శాసిస్తూ.. ఎలాన్ మస్క్ ఈ స్థాయికి చేరడం నిజంగా ఊహాతీతమైన విషయమే.