రిలయన్స్, ఇన్ఫోసిస్ సహా 8 కంపెనీల రూ.1.11 లక్షల కోట్లు ఆవిరి, నిలబడిన టీసీఎస్

ముంబై: గతవారం టాప్ 10 కంపెనీల్లోని ఎనిమిది సంస్థలు మార్కెట్ క్యాపిటలైజేషన్ భారీగా కోల్పోయాయి. వారాంతంలో మార్కెట్లు కుప్పకూలిన విషయం తెలిసిందే. 8 కంపెనీల మార్కెట్ క్యాపిటలైజేషన్ రూ.1,11.799.05 కోట్ల మేర నష్టపోయింది. ఇందులో ఐసీఐసీఐ బ్యాంకు, రిలయన్స్ ఇండస్ట్రీస్ ఎక్కువగా నష్టపోయాయి. సెన్సెక్స్ గతవారం 3 శాతం, నిఫ్టీ 3 శాతం మేర నష్టపోయింది. ఆగస్ట్ 31 నుండి సెప్టెంబర్ 4 మధ్య ఐదు సెషన్లలో సెన్సెక్స్ 1,110 పాయింట్లు నష్టపోయింది. మే 18వ తేదీ తర్వాత ఇది అతిపెద్ద పతనం. అప్పుడు 1,068 పాయింట్లు లేదా 3.4 శాతం మేర నష్టపోయింది.

రూ.10వేల కోట్లకు పైగా సంపద డౌన్

టాటా కన్సల్టెన్సీ సర్వీసెస్(TCS), HDFC బ్యాంకుల మార్కెట్ క్యాపిటలైజేషన్ మాత్రమే గతవారం పెరిగింది. మిగతా ఎనిమిది కంపెనీలు నష్టాల్లో ముగిశాయి.

ఐసీఐసీఐ బ్యాంకు మార్కెట్ క్యాపిటలైజేషన్ రూ.25,476.75 కోట్లు నష్టపోయి రూ.2,57,073.30,

రిలయన్స్ ఇండస్ట్రీస్ ఎం-క్యాప్ రూ.24,216.53 కోట్లు కోల్పోయి రూ.13,16,947.89,

హెచ్‌డీఎఫ్‌సీ మార్కెట్ క్యాప్ రూ.20,150.82 కోట్లు క్షీణించి రూ.3,17,321.63 కోట్లుగా,

కొటక్ మహీంద్రా మహీంద్రా బ్యాంకు మార్కెట్ క్యాపిటలైజేషన్ రూ.17,642.8 కోట్లు తగ్గి రూ.2,72,815.29,

ఐటీసీ మార్కెట్ క్యాప్ రూ.10,951.21 తగ్గి రూ.2,29,667.79 కోట్లుగా ఉంది. ఈ ఐదు కంపెనీల మార్కెట్ క్యాప్ రూ.10వేల కోట్ల నుండి రూ.25వేల కోట్లకు పైగా తగ్గింది.

రూ.1.11 లక్షల మార్కెట్ క్యాప్ తగ్గింది

ఇన్ఫోసిస్ మార్కెట్ క్యాప్ రూ.6,643.75 కోట్లు క్షీణించి రూ.3,91,544.91 కోట్లుగా,

హిందూస్తాన్ యూనీలీవర్ మార్కెట్ క్యాపిటలైజేషన్ రూ.6,471.69 కోట్లు తగ్గి రూ.4,99,186.72 కోట్లు,

భారతీ ఎయిర్‌టెల్ మార్కెట్ వ్యాల్యూ రూ.245.5 కోట్లు తగ్గి రూ.2,85,380.21 కోట్లుగా నిలిచంది.

ఈ ఎనిమిది కంపెనీల మార్కెట్ క్యాప్ రూ.1.11 లక్షల కోట్లు తగ్గింది.

ఇవి మాత్రమే దూకుడు

గతవారం కేవలం రెండు కంపెనీల మార్కెట్ క్యాపిటలైజేషన్ మాత్రమే పెరిగింది. ఇందులో ఐటీ దిగ్గజం టీసీఎస్, ప్రయివేటురంగ దిగ్గజం హెచ్‌డీఎఫ్‌సీ ఉన్నాయి.

టీసీఎస్ మార్కెట్ క్యాప్ రూ.19,756.31 కోట్లు పెరిగి రూ.8,59,202.29కు, HDFC బ్యాంకు ఎం-క్యాప్ రూ.2,641.5 కోట్లు పెరిగి రూ.6,16,240.17 కోట్లకు పెరిగింది.

టాప్ 10 కంపెనీల విషయానికి వస్తే వరుసగా రిలయన్స్ ఇండస్ట్రీస్, టీసీఎస్, HDFC బ్యాంకు, HUL, ఇన్ఫోసిస్, HDFC, భారతీ ఎయిర్‌టెల్, కొటక్ మహీంద్రా బ్యాంకు, ఐసీఐసీఐ బ్యాంకు, ITC ఉన్నాయి.