రిలయన్స్ రికార్డ్: టాప్ 10 కంపెనీల్లో ఎనిమిదింటి లాభం రూ.1.76 లక్షల కోట్లు

గతవారం మార్కెట్లు లాభాల్లో ముగిశాయి. కరోనా మహమ్మారి తగ్గుముఖం, అంతర్జాతీయ మార్కెట్లు లాభాల్లో కొనసాగడం, ఆసియా మార్కెట్లు కూడా అదే పంథాలో ఉండటం, చమురు ధరలు క్రమంగా పెరుగుతుండటం వంటి వివిధ కారణాలతో గత ఐదు సెషన్‌లలో ఎగుడుదిగుడులు చూసినప్పటికీ మొత్తానికి చివరికి లాభాల్లో ముగిశాయి. టాప్ 10 మోస్ట్ వ్యాల్యూ కలిగిన ఇండియన్ కంపెనీల్లో 8 కంపెనీల మార్కెట్ క్యాపిటలైజేషన్ పెరిగింది.

రూ.11 లక్షల కోట్లు దాటిన రిలయన్స్ ఎం-క్యాప్

పది కంపెనీల్లో ఎనిమిది కంపెనీలు భారీ లాభాలు నమోదు చేసి గత వారం రూ.1,76,489.28 కోట్ల మార్కెట్ క్యాపిటలైజేషన్‌ను యాడ్ చేశాయి. ఇందులో రిలయన్స్ ఇండస్ట్రీస్ మొదటి స్థానంలో ఉంది. గత వారం బీఎస్ఈ సెన్సెక్స్ 950.85 పాయింట్లు లేదా 2.81 శాతం ఎగిసింది. రిలయన్స్ ఇండస్ట్రీస్ మార్కెట్ షేర్ ఐదు సెషన్‌లలో రూ.1,08,213.62 కోట్లు ఎగిసి ఈ కంపెనీ మార్కెట్ వ్యాల్యూ రూ.11,15,418.03 కోట్లకు చేరుకుంది. ఈ మార్క్ చేరుకున్న తొలి ఇండియన్ కంపెనీ రిలయన్స్ కావడం గమనార్హం.

వీటి మార్కెట్ వ్యాల్యూ ఎంత పెరిగిందంటే

ఇతర పెద్ద కంపెనీల విషయానికి వస్తే హెచ్‌డీఎఫ్‌సీ బ్యాంకు మార్కెట్ వ్యాల్యూ రూ.27,788.22 పెరిగి రూ.5,67,093.60 కోట్లకు, ఐసీఐసీఐ బ్యాంకు ఎం-క్యాప్ రూ.12,729.16 పెరిగి రూ.2,35,648.10 కోట్లకు, హెచ్‌డీఎప్‌సీ రూ.8,110.36 పెరిగి రూ.3,18,597.21 కోట్లకు, భారతీ ఎయిర్‌టెల్ మార్కెట్ వ్యాల్యుయేషన్ రూ.6,301.17 పెరిగి రూ.3,11,757.83 కోట్లకు చేరుకుంది. టెక్ దిగ్గజం ఇన్ఫోసిస్ మార్కెట్ వ్యాల్యూ రూ.5,771.09 పెరిగి రూ.3,00,543.95 కోట్లకు చేరుకుంది.

టీసీఎస్, కొటక్ జూమ్, ఐటీసీ-హెచ్‌యూఎల్ డౌన్

కొటక్ మహీంద్రా బ్యాంకు మార్కెట్ క్యాపిటలైజేషన్ రూ.4,442.42 కోట్లు పెరిగి రూ.2,57,640.33 కోట్లకు, టాటా కన్సల్టెన్సీ సర్వీసెస్ ఎం-క్యాప్ రూ.3,133.24 కోట్లు పెరిగి రూ.7,68,131.91 కోట్లకు చేరుకుంది.

ఇక, ఐటీసీ వ్యాల్యూయేషన్ రూ.12,169.31 కోట్లు క్షీణించి రూ.2,26,299.98 కోట్లకు, హిందూస్తాన్ యూనీలీవర్ లిమిటెడ్ మార్కెట్ క్యాపిటలైజేషన్ రూ.3,277.62 కోట్లు క్షీణించి రూ.4,91,584.61 కోట్లకు తగ్గింది.

మార్కెట్ క్యాప్ పరంగా టాప్ టెన్ కంపెనీలు వరుసగా రిలయన్స్ ఇండస్ట్రీస్, టీసీఎస్, హెచ్‌డీఎప్‌సీ బ్యాంకు, హెచ్‌యూఎల్, హెచ్‌డీఎప్‌సీ, భారతీ ఎయిర్ టెల్, ఇన్ఫోసిస్, కొటక్ మహీంద్రా బ్యాంకు, ఐసీఐసీఐ బ్యాంకు, ఐటీసీ ఉన్నాయి.