IPO News: మార్కెట్లోకి రాబోతున్న బైజూస్ ఆకాష్ ఐపీవో.. పూర్తి వివరాలు ఇవే..

Byju's Aakash: దేశంలోని ఎడ్‌టెక్ స్టార్టప్ బైజూస్ ఆఫ్‌లైన్ కోచింగ్ సబ్సిడరీ ఆకాష్ ఎడ్యుకేషన్ సర్వీసెస్. దేశంలో అనేక నగరాల్లో ఆకాష్ కు కార్యాలయాలు ఉన్నాయి.

అయితే ఆకాష్ ఎడ్యుకేషన్ సర్వీసెస్ IPOను 2024లో తీసుకురావాలని బైజూస్ చూస్తున్నట్లు వార్తలు వెలువడ్డాయి. ఇప్పటికే నిధుల కొరతతో ఇబ్బంది పడుతున్న బైజూస్ వచ్చే ఏడాది మధ్య నాటికి ఆకాష్ ఐపీవో కోసం ప్లాన్ చేస్తున్నట్లు తెలుస్తోంది. ఈ నిధులను ఆకాష్ మౌలిక సదుపాయాలను పెంపొందించడానికి, దాని పరిధిని విస్తృతం చేయడానికి అవసరమైన మూలధనాన్ని అందిస్తుందని కంపెనీ భావిస్తోంది.

స్టార్టప్ బైజుస్ ఏప్రిల్ 2021లో సుమారు 950 మిలియన్ డాలర్లను వెచ్చింది ఆకాష్‌ను కొనుగోలు చేసింది. అప్పటి నుంచి సంస్థ ఆదాయం మూడు రెట్లు పెరిగింది. FY24లో రూ.900 కోట్ల నికర లాభంతో పాటు రూ.4000 కోట్ల ఆదాయాన్ని చేరుకోవటానికి ప్రయత్నిస్తోంది. కరోనా సమయంలో స్కూల్స్ మూతబడటంతో ఊపందుకున్న ఆన్ లైన్ విద్య.. ఆ తర్వాత విద్యా సంస్థలు తిరిగి తెరుచుకోవటంతో ఎడ్ టెక్ స్టార్టప్ కంపెనీలకు పెద్ద సవాలుగా మారింది. దీంతో కంపెనీలకు నష్టాలు భారీగా పెరిగాయి.

ఆకాష్ ప్రస్తుతం దేశవ్యాప్తంగా 325 కేంద్రాల ద్వారా దాదాపు 4 లక్షల మంది కంటే ఎక్కువ మంది విద్యార్థులకు సేవలను అందిస్తోంది. ప్రస్తుతం ఇది బైజూస్ కు విలువైన ఆస్థిగా మారింది. టెస్ట్-ప్రిప్ ఎడ్యుకేషన్ సెక్టార్‌లో ఆకాష్ 30 ఏళ్లకు పైగా అనుభవాన్ని కలిగి ఉంది. ఫండింగ్ కొరతను ఎదుర్కొంటున్న తరుణంలో ఆకాష్ ఐపీవో బైజూస్ కు చాలా కీలకంగా మారనుంది.