Byjus: రుణాల చెల్లింపుకు బైజూస్ కిల్లర్ ప్లాన్.. ఆ రెండు అస్త్రాలతో బిలియన్ డాలర్ల సమీకరణకు రెడీ

Byjus: భారీ అప్పుల్లో కూరుకుపోయిన దేశీయ ఎడ్‌ టెక్ సంస్థ బైజూస్.. రుణదాతలతో కొన్ని నెలలుగా చర్చలు జరుపుతోంది. కంపెనీ ఈ నెలాఖరులో ఫలితాలు రిలీజ్ చేయనుండగా.. నిధుల సమీకరణకు దిగాలనే యోచనలో ఉన్నట్లు తెలుస్తోంది. రాబోయే 6 నెలల్లో రుణాల తిరిగి చెల్లింపుకు ప్లాన్ రెడీ చేస్తోంది.

రుణాలు తీర్చడంలో ఇబ్బందులు ఎదుర్కొంటున్న బైజూస్.. మరో 6 నెలల్లో 1.2 బిలియన్ డాలర్ల టర్మ్ లోన్ తిరిగి చెల్లించనున్నట్లు ప్రకటించింది. ఇందుకోసం ఓ సంచలన నిర్ణయం తీసుకుంది. తాను 2021లో చేజిక్కించుకున్న గ్రేట్ లెర్నింగ్ సహా ఎపిక్‌ లను విక్రయించనున్నట్లు మీడియాకు తెలిపింది.

ఈ రెండు కంపెనీల నుంచి దాదాపు 1 బిలియన్ డాలర్లను బైజూస్ సమీకరించవచ్చని మార్కెట్ వర్గాలు భావిస్తున్నాయి. వీటి విక్రయాలకు సంబంధించి ప్రస్తుతం చర్చలు జరుగుతున్నాయని, ప్రైవేట్ ఈక్విటీ ఇన్వెస్టర్లకు కట్టబెట్టాలని కంపెనీ చూస్తున్నట్లు విశ్వసనీయ వర్గాల సమాచారం.

SBI మాజీ ఛైర్మన్ రజనీష్ కుమార్, ఇన్ఫోసిస్ మాజీ CFO TV మోహన్ దాస్ పాయ్ తో కూడిన ఓ సలహా మండలిని బైజూస్ ఏర్పాటు చేసింది. ఎడ్‌ టెక్ బోర్డుతో పాటు CEO రవీంద్రన్‌ కు ఈ కౌన్సిల్ సలహాలు ఇస్తూ, దిశానిర్దేశం చేస్తుంది. మండలి సలహాతోనే.. గ్రేట్ లెర్నింగ్, ఎపిక్‌ ల విక్రయానికి కంపెనీ నిర్ణయం తీసుకుని ఉంటుందని విశ్లేషకులు భావిస్తున్నారు.