Layoffs News: మరో దిగ్గజ సంస్థలో లేఆఫ్స్.. 9 శాతం ఉద్యోగులు ఇంటికే..

E commerce News: ఈమధ్య లేఆఫ్స్ అనేమాట నిత్యకృత్యం అయిపోయింది. ప్రతిరోజూ ప్రపంచంలోని ఏదో ఓ మూల నుంచి ఈ పదాన్ని వింటూనే ఉన్నాం. దిగ్గజ టెక్ కంపెనీలు ఇప్పటికే వేలాది మందిని ఇంటికి పంపాయి. మరో భారీ సంస్థ వాటి బాటలోనే నడడానికి సిద్ధమైంది.

ఇ-కామర్స్ దిగ్గజం ఇబే(eBay) దాదాపు వెయ్యి మంది సిబ్బందికి ఉద్వాసన పలకనున్నట్లు ప్రకటించింది. ఫుల్ టైం ఉద్యోగుల్లో దాదాపు 9 శాతం మందిని తొలగించడానికి రెడీ అయింది. అదనంగా రాబోయే నెలల్లో మరిన్ని రౌండ్ల తొలగింపులను ప్లాన్ చేస్తోంది. ఈమేరకు ఇమెయిల్ ద్వారా తన సిబ్బంది సమాచారం ఇచ్చింది.

'మేము పురోగతిని సాధిస్తున్నప్పుడు, మొత్తం హెడ్‌కౌంట్ మరియు ఖర్చులు వ్యాపార వృద్ధిని మించిపోయాయి. ఈ సమస్య పరిష్కారానికి, ఎండ్-టు-ఎండ్ అనుభవాన్ని మెరుగుపరచడానికి, కస్టమర్‌ల అభిరుచులకు అనుగుణంగా సంస్థను తీర్చదిద్దాల్సిన అవసరం ఉంది. ఇందుకోసం మా టీమ్స్‌ను సమలేఖనం చేయడంతో పాటు ఏకీకృతం చేసే సంస్థాగత మార్పులను అమలు చేస్తున్నాము' అని ఇబే సీఈవో జేమీ ఇయాన్నోన్ తెలిపారు.

గత ఫిబ్రవరిలో ప్రపంచవ్యాప్తంగా తన శ్రామికశక్తిలో 4 శాతం మంది అంటే 500 మంది ఉద్యోగులను ఇబే తొలగించింది. కొవిడ్ అనంతరం అకస్మాత్తుగా పెరిగిన డిమాండ్‌ను తీర్చేందుకు పలు కంపెనీలు అధికంగా నియామకాలు జరిపాయి. అయితే 2022 ముగింపు నుంచి పునర్నిర్మాణానికి ప్రాధాన్యత ఇస్తూ, ఖర్చులను తగ్గించుకునే పనిలో ఉన్నాయి.