ఒప్పందం కథ ముగిసింది.. రూపాయి కూడా ఇవ్వం.. ఇక యుద్ధంలోనే తేల్చుకుందామని ఇరాన్‌కు ట్రంప్ వార్నింగ్..

అమెరికా-ఇరాన్ వివాదంలో శాంతి ఒప్పందం ప్రసక్తే లేదని అమెరికా అధ్యక్షుడు డొనాల్డ్ ట్రంప్ తేల్చిచెప్పారు. తొమ్మిదో నెలలోకి అడుగుపెట్టిన ఈ సంఘర్షణకు దౌత్యపరమైన పరిష్కారం కనుగొనేందుకు ఉపాధ్యక్షుడు జేడీ వాన్స్ ఇరాన్ ఉన్నతాధికారులతో నేరుగా చర్చలు జరపాలని భావిస్తున్నట్లు వార్తలు వెలువడిన కొద్ది గంటల్లోనే ట్రంప్ ఈ సంచలన ప్రకటన చేశారు.

ఇరాన్‌తో వాషింగ్టన్‌కు ఇకపై ఎటువంటి ఒప్పందం అవసరం లేదని.. ఆ రోజులు ఎప్పుడో గడిచిపోయాయని ట్రంప్ తన సోషల్ మీడియా వేదిక 'ట్రూత్ సోషల్'లో స్పష్టం చేశారు. ఇప్పటికే అమెరికా వద్ద ఇరాన్‌కు చెందిన వందలాది బిలియన్ల డాలర్ల నిధులు ఉన్నాయని.. అంతేకాకుండా వ్యూహాత్మక హార్ముజ్ జలసంధి కూడా తమ నియంత్రణలోనే ఉందని ఆయన ప్రకటించారు.

మరోవైపు Iran యుద్ధం విషయంలో అమెరికా ప్రభుత్వ అగ్రనాయకత్వం మధ్య విభేదాలు బహిర్గతమవుతున్న వేళ, ఉపాధ్యక్షుడు జేడీ వాన్స్ దృష్టిని విదేశీ వ్యవహారాల నుండి దేశీయ రాజకీయాల వైపు మళ్లించేందుకు ట్రంప్ ప్రయత్నించారు. డెమోక్రాట్లు పరిపాలిస్తున్న మిన్నెసోటా, కాలిఫోర్నియా, ఇల్లినాయిస్ వంటి 'బ్లూ స్టేట్స్', ప్రధాన నగరాల్లో జరుగుతున్న భారీ అవినీతి, నేర కార్యకలాపాలపై పూర్తిగా దృష్టి సారించాలని ట్రంప్ వాన్స్‌కు పిలుపునిచ్చారు.

ఈ రాష్ట్రాల్లో ప్రతి నెలా బిలియన్ల డాలర్లు దోపిడీకి గురవుతున్నాయని ఆరోపించిన ట్రంప్.. ఈ నేరాలను అరికట్టడం ద్వారా అమెరికా ఫెడరల్ బడ్జెట్‌ను త్వరగా సమతుల్యం చేయవచ్చని పేర్కొన్నారు. అవినీతి డెమోక్రటిక్ నాయకత్వ రక్తంలోనే ఉందని ఆయన తీవ్ర స్థాయిలో విమర్శించారు.

Also Read

ఇరాన్‌లో భారీ పేలుళ్లు.. ఇక ఏ ఒక్కరూ మిగలరంటూ ట్రంప్ వార్నింగ్.. కమ్ముకున్న యుద్ధ మేఘాలు..

ఇటీవల జరిగిన మధ్యంతర ఎన్నికల్లో రిపబ్లికన్ పార్టీ ఘోర పరాజయం పాలవ్వడం, కాంగ్రెస్‌పై డెమోక్రాట్లు పట్టు సాధించడం వెనుక ఇరాన్ యుద్ధమే ప్రధాన కారణమని ఉపాధ్యక్షుడు జేడీ వాన్స్ బహిరంగంగా విమర్శించిన మరుసటి రోజే ట్రంప్ ఈ ఆదేశాలు జారీ చేయడం ప్రాధాన్యత సంతరించుకుంది.

ఇరాన్‌పై యుద్ధం వల్ల పెరిగిన ఇంధన ధరలు, ద్రవ్యోల్బణం సామాన్య ఓటర్లను రిపబ్లికన్ పార్టీకి దూరం చేశాయని.. సెనేట్‌ను కోల్పోవాల్సి వచ్చిందని వాన్స్ ఆవేదన వ్యక్తం చేశారు. గతంలో ఇస్లామాబాద్ వేదికగా ఇరాన్‌తో శాంతి చర్చలకు నాయకత్వం వహించిన వాన్స్, 2028 అధ్యక్ష ఎన్నికల బరిలో నిలిచే అవకాశాలు ఉన్నందున ఈ అపజయ భారం నుండి తనను తాను దూరం చేసుకునే ప్రయత్నం చేస్తున్నారు.

అయితే, ట్రంప్ మాత్రం ఇరాన్‌పై సైనిక చర్యలను సమర్థించుకుంటూనే.. ఆ దేశంపై ఆర్థిక దిగ్బంధనాలు, ఆంక్షలు పూర్తిస్థాయిలో పనిచేస్తున్నాయని తెలిపారు. అటు యూఎస్ విదేశాంగ మంత్రి మార్కో రూబియో సైతం యుద్ధ నష్టపరిహారం చెల్లించాలంటూ ఇరాన్ పెడుతున్న డిమాండ్లు అర్థరహితమని కొట్టిపారేశారు. ఇదే సమయంలో, తమ హెచ్చరికలను బేఖాతరు చేసిన నాలుగు చమురు ట్యాంకర్లపై దాడులు జరిపామని ఇరాన్ సైన్యం ప్రకటించడంతో పశ్చిమాసియాలో ప్రతిష్టంభన మరింత ముదిరింది.