Viral News: మరోసారి రికార్డు సృష్టించిన DLF.. ఫ్లాట్స్ కొనుగోళ్ల కోసం ఓ రేంజ్‌లో ఎగబడిన జనం..

Realestate News: దేశీయ రియల్ ఎస్టేట్ రంగం వేగంగా వృద్ది చెందుతోంది. కొనుగోలుదారుల నుంచి బలమైన డిమాండ్ ఉండటంతో ఆయా ప్రాజెక్టుల్లోని ఫ్లాట్స్ మరియు విల్లాలు హాట్ కేకుల్లా అమ్ముడవుతున్నాయి. తాజాగా DLF జరిపిన విక్రయాలు చూస్తే షాక్ అవ్వాల్సిందే.

రెసిడెన్షియల్ ప్రాపర్టీలకు దేశ రాజధాని న్యూఢిల్లీకి సమీపంలోని గురుగ్రామ్‌లో భారీ డిమాండ్ ఏర్పడింది. 1,113 లగ్జరీ అపార్ట్‌మెంట్లను ప్లాజెక్టు ప్రీ-లాంచ్ చేసిన 3 రోజుల్లోనే 7 వేల 200 కోట్లకు విక్రయించినట్లు రియాల్టీ మేజర్ DLF సోమవారం తెలిపింది. ఈ మేరకు రెగ్యులేటరీ ఫైలింగ్‌లో వివరాలను వెల్లడించింది.

ఈ రేంజ్‌లో విక్రయించడం DLFకు కొత్తేమీ కాదు. గత ఏడాది మార్చిలోనూ గురుగ్రామ్‌లోని తన హౌసింగ్ ప్రాజెక్ట్‌లో 7 కోట్ల కంటే ఎక్కువ ధర కలిగిన 1,137 లగ్జరీ అపార్ట్‌మెంట్‌లను కూడా DLF 3 రోజుల్లోనే 8 వేల కోట్లకు విక్రయించింది. కాగా ఇప్పుడు 'DLF ప్రివానా సౌత్' అనే కొత్త ప్రాజెక్టును ప్రారంభించింది. ఇది గురుగ్రామ్‌లోని సెక్టార్స్ 76 మరియు 77లోని 25 ఎకరాల్లో విస్తరించి ఉంది. ఈ ప్రాజెక్టులో మొత్తం 7 టవర్లతో కూడిన 4 BHK అపార్ట్‌మెంట్‌లు మరియు పెంట్‌హౌస్‌లు ఉన్నాయి.

'లగ్జరీ నివాసాల డెవలప్‌మెంట్‌ కోసం ప్రజల్లో పెరుగుతున్న డిమాండ్‌కు ఈ ఘటన నిదర్శనం. బల్క్ బుకింగ్స్‌ను నివారించేందుకు ప్రతి కొనుగోలుదారుకు కేవలం ఒక యూనిట్‌ను మాత్రమే కేటాయించాం. వీటిలో దాదాపు 25 శాతం సేల్స్ NRIల నుంచే జరిగాయి' అని DLF హోమ్ డెవలపర్స్ లిమిటెడ్ జాయింట్ MD మరియు చీఫ్ బిజినెస్ ఆఫీసర్ ఆకాష్ ఓహ్రి తెలిపారు.