Rocket Stock: ఒక్క రోజులో రూ.2,461 పెరిగిన స్టాక్ ధర.. మీ దగ్గర ఉందా..??

Rocket Stock: ప్రస్తుతం దేశీయ స్టాక్ మార్కెట్లలో చాలా కంపెనీలు తమ క్యూ1 ఆర్థిక ఫలితాలను వెల్లడిస్తున్నాయి. దీంతో కొన్ని కంపెనీల షేర్లు ఊహించని విధంగా లాభపడుతున్నాయి.

తాజాగా ఈరోజు మార్కెట్ ఇంట్రాడే ట్రేడ్‌లో దిసా ఇండియా షేర్లు BSEలో 20% ఎగువ సర్క్యూట్‌ తాకి భారీగా లాభపడ్డాయి. కంపెనీ షేర్లు ఆల్ టైమ్ గరిష్ఠ స్థాయి రూ.14,770.70కి చేరుకున్నాయి. అంటే బుధవారం నాటి ముగింపు ధర రూ.12,308.95తో పోలిస్తే షేర్ ధర రూ.2,461.75 పెరిగింది. జూన్ త్రైమాసిక ఫలితాల తర్వాత కంపెనీ షేర్లలో ఈ పెరుగుదల నమోదైంది.

పారిశ్రామిక ఉత్పత్తుల వ్యాపారంలో నిమగ్నమైన కంపెనీ Q1FY23లో రూ.7.53 కోట్ల నికర లాభాన్ని పోస్ట్ చేసింది. కానీ ఈ ఏడాది జూన్ త్రైమాసికంలో నికర లాభం రెండింతలు పెరిగి రూ.15.58 కోట్లకు చేరుకుంది. గత ఏడాది ఇదే త్రైమాసికంలో కంపెనీ కార్యకలాపాల ద్వారా వచ్చిన ఆదాయం రూ.64.19 కోట్లుగా ఉండగా.. FY24 జూన్ త్రైమాసికంలో 41 శాతం పెరిగి రూ.90.69 కోట్లకు చేరుకుంది.

2023-24 ఆర్థిక సంవత్సరంలో ఇప్పటివరకు కంపెనీ షేరు ధర 86 శాతం పెరిగింది. ఇదే కాలంలో S&PBSE సెన్సెక్స్ దాదాపు 12 శాతం లాభపడింది. కంపెనీ DISA బ్రాండ్ మోల్డింగ్ మెషీన్‌లు, వీల్‌బ్రేటర్ బ్రాండ్ షాట్ బ్లాస్టింగ్ మెషీన్‌లు.. ఇతర పర్యావరణ నియంత్రణ పరికరాల తయారీ, విక్రయాల వ్యాపారంలో నిమగ్నమై ఉంది.