Income Tax: ఆదాయపు పన్ను శాఖ సరికొత్త రికార్డ్.. భారీగా పెరిగిన వసూళ్లు..

Direct Tax Collection: భారత్‌లో ప్రత్యక్ష పన్ను వసూళ్లు గతేడాది కంటే 17.7 శాతం పెరిగి రూ.19.58 కోట్లకు చేరుకుని సరికొత్త రికార్డును సృష్టించాయి. ఇది ఆశించిన మొత్తం కంటే ఎక్కువని పన్ను శాఖ తాజా నోటిఫికేషన్‌లో పేర్కొంది.

2023-2024 ఆర్థిక సంవత్సరంలో రెవెన్యూ, కార్పొరేట్ సంస్థల ద్వారా సేకరించిన మొత్తం 7.40 శాతం పెరిగి రూ.1.35 లక్షల కోట్లుగా నమోదైంది. ఇదే క్రమంలో వ్యక్తిగత ఆదాయంపై పన్నులు, కార్పొరేట్ పన్నులతో కలిపి మొత్తం టాక్స్ కలెక్షన్ 18.48 శాతం పెరిగి రూ.23.37 లక్షల కోట్లకు చేరుకుంది. రీఫండ్‌లను లెక్కించిన తర్వాత పన్నుల నికర ఆదాయం 17.7 శాతం పెరిగి రూ.19.58 లక్షల కోట్లుగా నమోదయ్యాయి. వసూళ్లలో పెరుగుదల కంపెనీల ఆర్థిక పురోగతితో పాటు వ్యక్తుల విషయంలో పెరిగిన ఆదాయాల స్థాయిని సూచిస్తోంది.

2023-24 ఆర్థిక సంవత్సరంలో రూ.3.79 లక్షల కోట్ల మొత్తం రీఫండ్‌ రూపంలో చెల్లించినట్లు సెంట్రల్ బోర్డ్ ఆఫ్ డైరెక్ట్ టాక్సెస్ స్పష్టం చేసింది. బోర్డ్ ప్రకారం.. 2023-24 ఆర్థిక సంవత్సరానికి ప్రత్యక్ష నికర వసూళ్లు రూ.19.58 లక్షల కోట్లుగా అంచనా వేయబడింది. అంతకుముందు ఆర్థిక సంవత్సరం 2022-23లో ఇది రూ.16.64 లక్షల కోట్లు. 2023-24 ఆర్థిక సంవత్సరానికి బడ్జెట్‌ను మొదట రూ.18.23 లక్షల కోట్లుగా అంచనా వేయగా.. ఆ తర్వాత రూ. 19.45 లక్షల కోట్లకు సవరించారు.

2023-2024 ఆర్థిక సంవత్సరంలో ప్రత్యక్ష పన్నుల మొత్తం వసూళ్లు రూ.23.37 లక్షల కోట్లు. అంతకుముందు ఆర్థిక సంవత్సరం 2022-23లో వచ్చిన మొత్తం రూ.19.72 లక్షల కోట్లతో పోలిస్తే ఇది 18.48 శాతం అధికం. ఇదే క్రమంలో కార్పొరేట్ పన్ను వసూళ్లు గత ఏడాది రూ.10 లక్షల కోట్ల నుంచి 13.06 శాతం పెరిగి రూ.11.32 లక్షల కోట్లకు చేరాయి. 2023-24 ఆర్థిక సంవత్సరంలో నికర కార్పొరేట్ పన్ను వసూళ్లు రూ.9.11 లక్షల కోట్లు. ఇది గత ఏడాది రూ.8.26 లక్షల కోట్లతో పోలిస్తే 10.26 శాతం వృద్ధిని సూచిస్తుంది. 2023-24 ఆర్థిక సంవత్సరంలో సెక్యూరిటీస్ ట్రాన్సాక్షన్ ట్యాక్స్(STT)తో సహా మొత్తం వ్యక్తిగత ఆదాయపు పన్ను వసూళ్లు రూ.12.01 లక్షల కోట్లుగా నమోదయ్యాయి.