e-rupee: బ్యాంకుల ఆసక్తితో మరిన్ని నగరాల్లో e-రూపాయి సేవలు

e-rupee: భారత డిజిటల్ కరెన్సీ e-రూపాయిని ప్రజలకు అందుబాటులోకి తీసుకొచ్చేందుకు RBI వడివడిగా అడుగులు వేస్తోంది. కంగారు లేకుండా నెమ్మదిగా జనంలోకి పంపిస్తామని చెబుతున్నా, కేంద్ర బ్యాంకు దూకుడు ప్రదర్శిస్తోంది. మొదట 8 బ్యాంకులతో 5 నగరాల్లో ప్రారంభించిన ఈ సేవలను, మరిన్ని ప్రాంతాలకు విస్తరిస్తున్నట్లు పేర్కొంది.

మరిన్ని నగరాల్లో e-రూపాయి:

డిజిటల్ కరెన్సీ పైలట్ ప్రాజెక్టులో కొత్తగా మరో 5 బ్యాంకులు భాగం కానున్నట్లు రిజర్వ్ బ్యాంకు బుధవారం తెలిపింది. రిటైల్ కస్టమర్ల కోసం e-రూపాయిని ఈ బ్యాంకుల ద్వారా అందించనున్నట్లు పేర్కొంది. మరిన్ని బ్యాంకులు చేరడంతో.. ఈ ప్రాజెక్ట్ 9 నగరాలకు విస్తరించబడుతున్నట్లు వెల్లడించింది. తొందరపడకుండా నెమ్మదిగా, స్థిరంగా డిజిటల్ కరెన్సీని ప్రజలకు అలవాటు చేయాలని భావిస్తున్నట్లు చెప్పింది.

అవాంతరాలేమీ లేవు:

8 బ్యాంకుల ద్వారా 5 నగరాల్లో e-రూపాయి వినియోగాన్ని డిసెంబర్ ప్రారంభంలో రిజర్వ్ బ్యాంకు మొదలుపెట్టింది. సెంట్రల్ బ్యాంకు డిజిటల్ కరెన్సీ(CBDC) ప్రస్తుతం 50 వేల మంది వినియోగదారులకు మాత్రమే అందుబాటులో ఉంది. వారిలో 5 వేల మంది వ్యాపారులు. 5 నగరాల్లోని 8 బ్యాంకులు ప్రస్తుతం ఈ సేవలను అందిస్తున్నాయని డిప్యూటీ గవర్నర్ రబి శంకర్ తెలిపారు. "ఇప్పటివరకు ఎటువంటి అవాంతరాలు ఎదురుకాలేదు. అందువల్ల ప్రస్తుత పైలట్ సేవలను మరిన్ని ఇతర నగరాలకూ విస్తరించనున్నాం. అందుకే బ్యాంకులను సైతం 5 నుంచి 9కి పెంచాం" అని వెల్లడించారు.

తొందరేమీ లేదు:

"ప్రజలు డిజిటల్ కరెన్సీకి మారే ప్రక్రియ క్రమంగా, నెమ్మదిగా జరగాలని కోరుకుంటున్నాము. త్వరితగతిన పూర్తి చేయాలని ఏమీ తొందరపడటం లేదు. వినియోగదారులు, వ్యాపారులు పరంగా మాకు కొన్ని లక్ష్యాలు ఉన్నాయి. వాటి ఆధారంగా నెమ్మదిగా e-రూపాయిని ప్రజల్లోకి తీసుకువెళ్తాము. పూర్తి స్థాయిలో అమలు చేస్తే ఆ ప్రభావం ఎలా ఉంటుందో వాస్తవికంగా అర్థం చేసుకోవడానికి ప్రాముఖ్యత ఇస్తున్నాం" అని డిప్యూటీ గవర్నర్ తెలిపారు. లావాదేవీల పరంగా చూస్తే ఇప్పటివరకు కేవలం రూ.7.7 లక్షల విలువైన ట్రాన్సాక్షన్స్ మాత్రమే జరిగాయని చెప్పారు.

టోకు, రిటైల్ వినియోగానికి..

గతేడాది నవంబర్ 1, డిసెంబర్ 1న డిజిటల్ కరెన్సీని టోకు, రిటైల్ వినియోగం కోసం RBI ప్రారంభించింది. హోల్‌సేల్ CBDC వినియోగాన్ని ప్రభుత్వ సెక్యూరిటీలు, సెకండరీ మార్కెట్ లావాదేవీల సెటిల్‌మెంట్‌ కు పరిమితం చేశారు. రిటైల్ ఇ-రూపాయిని మాత్రం వినియోగదారులు, వ్యాపారుల మధ్య కొనుగోళ్ల కోసం క్లోజ్డ్ యూజర్ గ్రూప్(CUG)గా పైలట్ చేస్తున్నారు.