మ్యూచువల్ ఫండ్స్‌లో ఇన్వెస్ట్ చేయాలనుకుంటున్నారా..? ఇది తెలుసుకోకపోతే నష్టపోతారు..

Mutual Funds: కరోనా అనంతరం స్టాక్ మార్కెట్‌లో పెట్టుబడి పెట్టే వారి సంఖ్య విపరీతంగా పెరిగింది. మార్కెట్‌పై అంతగా అవగాహన లేనివారు మ్యూచువల్ ఫండ్స్ వైపు మొగ్గుచూపుతున్నట్లు గణాంకాలు చెబుతున్నాయి. అయితే వీటిలో డైరెక్ట్, రెగ్యులర్ అనే రెండు రకాల ఫండ్స్ ఉంటాయి. చాలా మందికి వాటి మధ్య తేడా తెలియదు. ఎవరో బ్రోకర్ చెప్పిన మాటలు నమ్మి, ఏమీ ఆలోచించకుండా ఇన్వెస్ట్ చేసి తక్కువ రాబడితో సరిపెట్టుకుంటారు.

డైరెక్ట్ ప్లాన్ ద్వారా మ్యూచువల్ ఫండ్ అసెట్ మేనేజ్‌మెంట్ కంపెనీ (AMC)తో నేరుగా పెట్టుబడి పెట్టవచ్చు. పంపిణీదారులు లేదా ఏజెంట్ల ప్రమేయం ఇందులో ఉండదు. వ్యక్తిగత పెట్టుబడిదారులు నచ్చిన మ్యూచువల్ ఫండ్ ఎంచుకోవడంలో పూర్తి స్వయంప్రతిపత్తి ఉంటుంది. ఏజెంట్/బ్రోకర్ ఫీజులు లేకపోవడంతో.. సాధారణ ప్లాన్‌లతో పోలిస్తే ఇందులో తక్కువ వ్యయ నిష్పత్తి ఉంటుంది. అందుకే అధిక రాబడిని అందిస్తాయి.

రెగ్యులర్ ప్లాన్‌లో ఏజెంట్లు, బ్రోకర్లు, డిస్ట్రిబ్యూటర్లు, బ్యాంకర్లు లేదా సలహాదారుల క్రియాశీల భాగస్వామ్యం ఉంటుంది. పెట్టుబడిదారులు ఈ మధ్యవర్తుల ద్వారానే పెట్టుబడి పెడతారు. AMC వీరికి కమీషన్ చెల్లిస్తుంది. అయితే ఇది మీ స్వంత జేబు నుంచి లేదా పెట్టుబడిపై వచ్చిన రాబడి నుంచి చెల్లించాల్సి ఉంటుంది. తద్వారా ఎక్కువ వ్యయ నిష్పత్తి ఉంటుంది. డెరెక్ట్ ప్లాన్స్‌తో పోలిస్తే తక్కువ రాబడి రావడానికి ప్రధానం కారణం ఇదే అని చెప్పవచ్చు.

రెగ్యులర్ ప్లాన్‌ల కంటే డైరెక్ట్ మ్యూచువల్ ఫండ్స్ మెరుగైన రాబడిని అందించినట్లు నేషనల్ ఇన్‌స్టిట్యూట్ ఆఫ్ సెక్యూరిటీస్ మార్కెట్స్‌లో ఫుల్‌టైమ్ అసిస్టెంట్ ప్రొఫెసర్ డాక్టర్ ప్రదీప్తరథి పాండా తెలిపారు. ఇది తాను చెప్పేది కాదని చారిత్రక డేటా స్పష్టంగా తెలియజేస్తోందన్నారు. చాలా మంది రిటైల్ ఇన్వెస్టర్లకు తగిన ఫండ్ ఎంచుకునే నైపుణ్యం ఉండటం లేదు. ఇటువంటి పరిస్థితుల్లో అర్హత కలిగిన సెబీ రిజిస్టర్డ్ ఇన్వెస్ట్‌మెంట్ అడ్వైజర్లు, అనుభవజ్ఞులైన నిపుణులచే నిర్వహించబడే రెగ్యులర్ ప్లాన్‌లను ఎంచుకోవడం ఉత్తమం.