వరుసగా నాల్గవ వారం బంగారంపై ఆఫర్లను ప్రకటించిన డీలర్లు.. ఎందుకంటే..?

కొన్ని రోజుల క్రితం కొండెక్కి కూర్చున్న బంగారం ధరలు వరుసగా తగ్గుతూ వస్తున్నాయి. దీంతో బంగారు వ్యాపారస్తులు కూడా పసిడిపై డిస్కౌంట్‌ ఆఫర్లను ఇస్తున్నారు. ప్రపంచంలోనే పుత్తడి ఎక్కువగా వినియోగిస్తున్న అతిపెద్ద దేశాల్లో భారత్ రెండో స్థానంలో ఉంది. ఇక వరుసగా బంగారం తగ్గుముఖం పడుతుండటంతో నాలుగో వారంలో కూడా వ్యాపారస్తులు డిస్కౌంట్లు ప్రకటించారు. అంతేకాదు బంగారం కొనుగోలుకు ప్రస్తుతం మంచి సమయం కాదన్న సెంటిమెంట్ కూడా ఉండటంతో పసిడిని కొనుగోలు చేసేందుకు చాలామంది ఆసక్తి చూపడం లేదు. దీంతో ఆఫర్లు ఇస్తున్నాయి ఆయా బంగారు దుకాణాలు.

గత వారం బంగారం ధర ఔన్సుకు 40 డాలర్లు ఉండగా దాంతో పోల్చితే, అధికారిక దేశీయ ధరలపై 12.5% దిగుమతి మరియు 3% జిఎస్‌టితో కలిపి డిస్కౌంట్ ఔన్స్‌కు 30 డాలర్లకు పడిపోయింది. ఇక పండగల సీజన్ సమీపిస్తున్నప్పటికీ బంగారం ధరలు అధికంగానే ఉండటంతో కొనుగోలు చేసేందుకు వినియోగదారులు ఆసక్తి చూపడం లేదని వ్యాపారస్తులు చెబుతున్నారు. ఒకవేళ తగ్గినా అరకొరగా ఉందని చెబుతున్న వ్యాపారస్తులు వచ్చేనెలలో దసరా పండగ ఉందని అయితే బంగారం మాత్రం కొనుగోలు చేస్తారన్న నమ్మకం తమకు లేదని ఆవేదన వ్యక్తం చేస్తున్నారు.

అంతర్జాతీయంగా బంగారం ధరలు కాస్త తగ్గుముఖం పడటంతో సింగపూర్‌లో కొనుగోలుదారుల నుంచి బంగారంకు డిమాండ్ ఏర్పడింది. బంగారం ధరలు తగ్గేకొద్దీ కొనుగోలు దారులు బంగారంను కొనేందుకు ఆసక్తి చూపుతారని గోల్డ్ సిల్వర్ డీలర్ బ్రియాన్ లాన్ చెప్పారు. అయితే రీటెయిల్‌లో మాత్రం బంగారం కొనుగోళ్లు ఊహించిన స్థాయిలో ఉండవని చెప్పారు. బంగారం సేల్స్ గౌరవప్రదంగానే ఉన్నాయని అయతే గత నాలుగావారాలుగా తగ్గుతూ వస్తున్నాయని ఓ ప్రముఖ బంగారు దుకాణం సంస్థ సేల్స్ మేనేజర్ చెప్పారు. అయితే నాల్గవ త్రైమాసికంలోకి ప్రవేశించగానే ఆఫర్లు కూడా తగ్గుముఖం పట్టే అవకాశాలున్నాయని ఆయన చెప్పారు.

ఇదిలా ఉంటే అంతర్జాతీయ మార్కెట్లో పసిడి ధర ఔన్స్‌కు 0.82 శాతం తగ్గి 1942 డాలర్లకు దిగి వచ్చింది. వెండి ధర కూడా ఔన్స్ 1.38 శాతం తగ్గి 26.91 డాలర్లు పలికింది. అమెరికా - చైనా ట్రేడ్ వార్, భారత్ - చైనా సరిహద్దు టెన్షన్, డాలర్ వ్యాల్యూ, ఈక్విటీ వ్యాల్యూ, ప్రస్తుతం కరోనా మహమ్మారి-వ్యాక్సీన్ అంశం బంగారంపై ప్రభావం చూపిస్తున్నాయి.