ధన్తేరస్ రోజున బంగారం కొనేందుకు ఎగబడిన పసిడి ప్రియులు.. ఒక్క రోజే రూ.66 వేల కోట్ల బిజినెస్..

Dhanteras 2026: ధనత్రయోదశి (Dhanteras) పవిత్ర సందర్భాన్ని పురస్కరించుకుని దేశవ్యాప్తంగా బులియన్ మార్కెట్లలో బంగారం, వెండి కొనుగోళ్లు ఊహించని స్థాయిలో ఎగబాకాయి. పండుగ షాపింగ్ ముహూర్తానికి సరిగ్గా ముందు Gold ధరలు స్వల్పంగా తగ్గడం వినియోగదారులను పెద్ద ఎత్తున షోరూమ్‌ల వైపు ఆకర్షించింది. పీటీఐ (PTI) నివేదికల ప్రకారం.. ఈ ఏడాది ధంతేరస్ ఒక్క రోజే దేశవ్యాప్తంగా సుమారు రూ. 60,000 కోట్ల విలువైన బంగారు వ్యాపారం జరిగినట్లు మార్కెట్ నిపుణులు అంచనా వేశారు.ఇది గత ఏడాదితో పోలిస్తే విలువ పరంగా ఏకంగా 15 నుండి 20 శాతం వృద్ధిని నమోదు చేసింది.

ఆల్ ఇండియా జ్యువెలర్స్ అండ్ గోల్డ్ స్మిత్స్ ఫెడరేషన్ గణాంకాల ప్రకారం.. గత కొన్ని రోజులుగా పండుగ సీజన్‌లో జరిగిన మొత్తం Gold, వెండి లావాదేవీలు రూ. 66 వేల కోట్లను దాటగా, ఒక్క ఢిల్లీ బులియన్ మార్కెట్లోనే రూ. 10 వేల కోట్లకు పైగా వ్యాపారం జరగడం విశేషం.ధరలు గత ఏడాదితో పోలిస్తే గణనీయంగా పెరిగినప్పటికీ వినియోగదారుల కొనుగోలు సెంటిమెంట్ బలంగానే ఉందని ఆల్ ఇండియా జెమ్ అండ్ జ్యువెలరీ డొమెస్టిక్ కౌన్సిల్ (GJC) చైర్మన్ రాజేష్ రోక్డే తెలిపారు.

గత సంవత్సరం అక్టోబర్ 18న ధంతేరస్ నాడు 10 గ్రాముల 24 క్యారెట్ల బంగారం ధర రూ. 1,32,400 ఉండగా.. ఈ ఏడాది శుక్రవారం నాటికి ఢిల్లీలో పన్నులతో కలిపి రూ. 1,46,300గా నమోదైంది. ఈ ఏడాది జనవరి 29న నమోదైన రూ. 1,83,000 రికార్డు గరిష్టంతో పోలిస్తే ప్రస్తుతం ధర 20 శాతం తగ్గడం ఇన్వెస్టర్లకు అనుకూలంగా మారింది. అలాగే జనవరి 29న కిలోగ్రాముకు రూ. 4,04,500 తాకిన వెండి ధరలు ప్రస్తుతం 52.4 శాతం తగ్గి రూ. 1,92,500 వద్ద ట్రేడ్ అవుతుండటంతో వెండి నాణేలు, కడ్డీలకు భారీ డిమాండ్ ఏర్పడింది.

Also Read

బంగారం ధర ఏడాది చివరకు రూ. 1.25 లక్షలకు.. సరికొత్త అంచనాను విడుదల చేసిన గోల్డ్‌మన్ సాక్స్..

జిజెసి వైస్ చైర్మన్ అవినాష్ గుప్తా ప్రకారం.. వెండి అమ్మకాలు విలువలో 30 శాతం, పరిమాణంలో 10 శాతం మేర పెరిగాయి. మెట్రో నగరాలతో పాటు జైపూర్, డెహ్రాడూన్, సూరత్, బెల్గాం, ఆరా, రాయ్‌పూర్ వంటి ద్వితీయ, తృతీయ శ్రేణి నగరాల్లో కూడా సరికొత్త కొనుగోలు ధోరణి కనిపించింది.

కళ్యాణ్ జ్యువెలర్స్ ఎగ్జిక్యూటివ్ డైరెక్టర్ రమేష్ కళ్యాణరామన్ మాట్లాడుతూ.. 22 క్యారెట్ల బంగారం ధర గ్రాముకు రూ. 13,385 నుండి రూ. 13,150కి తగ్గడం వినియోగదారుల రద్దీని మరింత పెంచిందని తెలిపారు. పెండెంట్లు, గాజులు, గొలుసులు, చిన్న బంగారు-వెండి నాణేల విక్రయాలు జోరుగా సాగాయి.

అలాగే సెన్కో గోల్డ్ సీఈఓ సువంకర్ సేన్.. తమ అమ్మకాల పరిమాణం (Volume) 25 శాతానికి పైగా పెరిగిందని వెల్లడించగా, పీఎన్‌జీ జ్యువెలర్స్ ఎమ్‌డీ సౌరభ్ గాడ్గిల్ ప్రాథమిక సూచనల ప్రకారం 25-30 శాతం వృద్ధి నమోదైనట్లు పేర్కొన్నారు. సుదీర్ఘ దీపావళి వారాంతం, ముందస్తు అడ్వాన్స్ బుకింగ్‌లు, రాబోయే వివాహాల సీజన్ డిమాండ్ మార్కెట్‌కు బలమైన ఊతాన్నిచ్చాయి.

ఇక పీసీ జ్యువెలర్స్ మేనేజింగ్ డైరెక్టర్ బలరామ్ గార్గ్ తెలిపిన వివరాల ప్రకారం.. అమ్మకాల పరిమాణంలో 30-35 శాతం, విలువలో 45-50 శాతం వృద్ధి నమోదైంది. పాత బంగారాన్ని ఇచ్చి కొత్త ఆభరణాలు తీసుకునే (Old Gold Exchange) ట్రెండ్ ఈసారి బాగా పెరిగినట్లు జెమ్ అండ్ జ్యువెలరీ ఎక్స్‌పోర్ట్ ప్రమోషన్ కౌన్సిల్ ఛైర్మన్ కిరిత్ భన్సాలీ వివరించారు. మరోవైపు వరల్డ్ గోల్డ్ కౌన్సిల్ ఇండియా సీఈఓ సచిన్ జైన్ మాట్లాడుతూ.. ఆభరణాలు, భౌతిక నాణేలతో పాటు గోల్డ్ ఈటీఎఫ్‌లు (Gold ETFs), డిజిటల్ గోల్డ్ మార్గాల్లోనూ కొనుగోళ్లు జరిగాయని చెప్పారు. ఎంఎంటీసీ-పీఏఎంపీ ఎండీ సమీత్ గుహా ప్రకారం.. వినియోగదారులు పెద్దమొత్తంలో పెట్టుబడి పెట్టడానికి బదులుగా వివిధ బడ్జెట్లకు తగినట్లుగా చిన్న చిన్న నాణేలు, కడ్డీల కొనుగోలుకే ఎక్కువ మొగ్గు చూపారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.