విమాన ప్రయాణికులకు గుడ్ న్యూస్.. టికెట్ క్యాన్సిలేషన్ ఫ్రీ.. ఎటువంటి అదనపు ఛార్జీలు చెల్లించనవసరం లేదు..

భారతీయ విమాన ప్రయాణికులకు సంతోషకరమైన వార్త. డైరెక్టరేట్ జనరల్ ఆఫ్ సివిల్ ఏవియేషన్ (DGCA) తాజాగా ఒక కొత్త ప్రతిపాదనను తీసుకొచ్చింది. దీని ప్రకారం, ఇకపై మీరు విమాన టికెట్ బుక్ చేసిన 48 గంటలలోపు దానిని రద్దు చేసుకోవచ్చు లేదా మార్చుకోవచ్చు. అదీ ఎటువంటి అదనపు రుసుము లేకుండా మీరు ఆ పనులు చేయవచ్చు. ఇప్పటి వరకు, విమానయాన సంస్థలు రద్దులకు గానూ, మార్పులకు గానూ భారీ ఫీజులు వసూలు చేస్తూ ప్రయాణికులను ఇబ్బందులకు గురిచేశాయి. DGCA తీసుకున్న ఈ కొత్త నిర్ణయం ఆ సమస్యను పూర్తిగా తగ్గించబోతోంది.

DGCA ప్రతిపాదన ప్రకారం.. ప్రయాణికులు టికెట్ బుక్ చేసిన 48 గంటల లోపు రద్దు చేసుకోవడం లేదా తేదీ మార్చుకోవడం సాధ్యమవుతుంది. ఈ సమయంలో రద్దు ఫీజులు పూర్తిగా మాఫీ చేయబడతాయి. అయితే కొత్త టికెట్ ధర ఎక్కువగా ఉంటే, ప్రయాణికుడు కేవలం ధర తేడాను మాత్రమే చెల్లించాలి. ఈ నియమం దేశీయ విమాన టిక్కెట్లకు 5 రోజుల ముందుగానే బుక్ చేసిన ప్రయాణాలకు, అంతర్జాతీయ టిక్కెట్లకు 15 రోజుల ముందుగానే బుక్ చేసిన ప్రయాణాలకు వర్తిస్తుంది. అంటే, బుకింగ్ చేసిన వెంటనే మార్పు అవసరం వచ్చినా, ఇకపై ఎయిర్‌లైన్‌లు ఎటువంటి అదనపు జరిమానాలు విధించలేవు.

టిక్కెట్లు ఏజెంట్ లేదా ట్రావెల్ పోర్టల్ ద్వారా కొనుగోలు చేసినప్పటికీ.. రీఫండ్ బాధ్యత ఎయిర్‌లైన్‌దే నని DGCA స్పష్టంగా పేర్కొంది. ఏజెంట్లను ఎయిర్‌లైన్‌ల అధికార ప్రతినిధులుగా పరిగణిస్తామని DGCA తెలిపింది. అంటే టికెట్ రద్దు చేసిన తర్వాత రీఫండ్ ఆలస్యమైతే లేదా అందకపోతే, ప్రయాణికుడు ఎయిర్‌లైన్‌ను నేరుగా సంప్రదించవచ్చు. అదనంగా అన్ని విమానయాన సంస్థలు రీఫండ్ ప్రక్రియను 21 పని దినాలలోపు పూర్తి చేయాలి.ఇది ఆలస్యమైన రీఫండ్‌లపై ప్రయాణికుల ఫిర్యాదులను తగ్గించడంలో కీలక పాత్ర పోషిస్తుంది.

DGCA తెలిపిన వివరాల ప్రకారం ప్రయాణికుడు ఆరోగ్య సమస్య లేదా అత్యవసర పరిస్థితి కారణంగా ప్రయాణం రద్దు చేసుకోవాల్సి వస్తే, విమానయాన సంస్థ పూర్తి రీఫండ్ ఇవ్వవచ్చు లేదా క్రెడిట్ షెల్ జారీ చేయవచ్చు. తద్వారా ప్రయాణికుడు తరువాతి తేదీలో అదే మొత్తాన్ని వినియోగించుకోవచ్చు. అదేవిధంగా టికెట్ బుకింగ్ చేసిన 24 గంటల్లోపే ప్రయాణికుడు పేరులో చిన్న పొరపాటు సవరించాలనుకుంటే, విమానయాన సంస్థ ఉచితంగా మార్పు చేసే అవకాశం ఇవ్వాలి. అయితే, ఇది ఎయిర్‌లైన్ అధికారిక వెబ్‌సైట్ ద్వారా నేరుగా బుక్ చేసిన టిక్కెట్లకు మాత్రమే వర్తిస్తుంది.

ఇటీవల టికెట్ రద్దు ఫీజులు, ఆలస్యమైన రీఫండ్‌లు, ఏజెంట్ సమస్యలు వంటి అంశాలపై భారీగా ఫిర్యాదులు రావడంతో DGCA ఈ చర్య తీసుకుంది. ప్రయాణికుల హక్కులను రక్షిస్తూ, ఎయిర్‌లైన్‌లు పారదర్శకంగా వ్యవహరించాలని ఇది నిర్దేశిస్తోంది. DGCA ఈ ప్రతిపాదనపై నవంబర్ 30 వరకు ప్రజల సూచనలు కోరింది. ఆ తరువాత ఈ నియమం అధికారికంగా అమల్లోకి వస్తుందని అంచనా. ఈ మార్పులు అమలులోకి వస్తే, భారతదేశంలో విమాన ప్రయాణం ప్రయాణికులకు అనుకూలంగా మారనుంది.