రూ.11 లక్షల కోట్ల ఆస్తి: బిల్ గేట్స్-మెలిందా పంపకాలు ఎలా?

ప్రపంచ నాలుగో కుబేరుడు బిల్ గేట్స్-మెలిందా గేట్స్ విడిపోతున్నారు. ఈ నేపథ్యంలో వారి సంపాదన పంపకంపై చర్చ సాగుతోంది. వీరి సంపద వ్యాల్యూ 145 బిలియన్ డాలర్లుగా ఉంటుందని అంచనా. అంటే భారత కరెన్సీలోరూ.11 లక్షల కోట్లు. గతంలో అమెజాన్ అధినేత జెఫ్ బెజోస్ తన భార్యకు విడాకులు ఇచ్చినప్పుడు జరిగిన ఆస్తి పంపకాలు ఇప్పుడు మరోసారి చర్చనీయాంశంగా మారాయి. బెజోస్ తన ఆస్తిలో 75 శాతం వాటాను తన వద్ద అట్టిపెట్టుకొని 25 శాతం మెకంజీకి ఇచ్చారు. అమెజాన్‌లోని ఉమ్మడి వాటా నుండి 16 శాతం మెకంజీకి వాటాగా వచ్చింది. దీంతో ఆమె ప్రపంచ నాలుగో సంపన్న మహిళగా నిలిచారు.

ఫౌండేషన్‌కే ఎక్కువ వాటా

ఇప్పుడు గేట్స్ దంపతుల డైవోర్స్ పంపకాలు అంత ఈజీగా ఉండకపోవచ్చునని భావిస్తున్నారు. బెజోస్ తరహాలో పెట్టుబడులన్నీ ఒకచోట లేకపోవడమే ఇందుకు ప్రధాన కారణంగా చెబుతున్నారు. పైగా ప్రపంచంలోని అతిపెద్ద ఫౌండేషన్లలో ఒకటైన గేట్స్ ఫౌండేషన్‌కు ఇద్దరు కలిసి నేతృత్వం వహిస్తున్నారు. దంపతులుగా విడిపోయినా ఫౌండేషన్ కోసం కలిసి పని చేస్తామని వారు వెల్లడించారు. ఆస్తిలో ఎక్కువ వాటా ఫౌండేషన్‌కే వెళ్తుంది.

పిల్లలకు నామమాత్రమే

ప్రస్తుతం 1.8 బిలియన్ డాలర్ల(రూ.13,500 కోట్లు) షేర్లు మెలిందా పేర బదలీ అయినట్లు తెలుస్తోంది. గేట్స్ దంపతులు వాషింగ్టన్‌లో తమ ఎస్టేట్‌లో నివసిస్తున్నారు. ఈ ఎస్టేట్ విస్తీర్ణం 66 వేల చదరపు అడుగులు. వాషింగ్టన్ చట్టాల ప్రకారం ఇల్లు మాత్రం భార్యాభర్తలు విడిపోతే చెరి సగం పంచుకోవాలి. తమ ముగ్గురు పిల్లలకు ఆస్తిలో వాటా నామమాత్రమే ఇస్తామని బిల్ గేట్స్ ఇదివరకు ప్రకటించారు.

27 సంవత్సరాల తర్వాత విడిపోతున్నారు

బిల్ గేట్స్, మెలిందా 27 సంవత్సరాలు కలిసి ఉన్నారు. ఇన్నేళ్ల తర్వాత విడిపోవడానికి గల కారణాలు ఏమిటనే చర్చ సాగుతోంది. బిల్ గేట్స్ ప్రపంచంలోని కుబేరుల్లో 4వ స్థానంలో ఉన్నారు. హార్వర్డ్ యూనివర్సిటీలో చేరిన గేట్స్, మధ్యలోనే చదువును ఆపేశారు. ఆ తర్వాత 1975లో పాఠశాల స్నేహితుడు పాల్ అలెన్‌తో కలిసి టెక్నాలజీ దిగ్గజం మైక్రోసాఫ్ట్‌ సంస్థను ఏర్పాటు చేశారు. ఈ కంపెనీ 1986లో IPOకు వచ్చింది. ఆ సమయంలో గేట్స్‌కు మైక్రోసాఫ్ట్‌లో 49 శాతం వాటా ఉంది. ఐపీఓకు మంచి స్పందన రావడంతో కుబేరుడయ్యాడు.