Deloitte News: కీలక రిపోర్ట్ విడుదల చేసిన డెలాయిట్.. ఈ ఏడాది జీతాల పెంపు ఎలా ఉండనుందంటే..

Salary hikes: వరుస లేఆఫ్స్, వేతనాల కోతలతో కార్పొరేట్ కంపెనీలు ఉద్యోగులను నానా ఇబ్బందులు పెడుతున్నాయి. దీంతో భవిష్యత్తుపై బెంగతో పలువురు ఈ తరహా ఉద్యోగాలను వదిలి సొంత వ్యాపారం లేదా ఊళ్లో వ్యవసాయం చేసుకునేందుకు పారిపోతున్నారు. ఈ నేపథ్యంలో ప్రముఖ అకౌంటింగ్ సంస్థ డెలాయిట్ గుడ్‌న్యూస్ చెప్పింది.

కార్పొరేట్ కంపెనీలు ఈ ఏడాది ఉద్యోగుల వేతనాలు బాగానే పెంచుతాయని డెలాయిట్ ఇండియా అంచనా వేసింది. టాప్ పెర్ఫార్మ్ చేసిన కంపెనీలు సగటు రేటింగ్ ఉన్న ఉద్యోగులకు 1.8 రెట్లు మేర ఇంక్రిమెంట్లు ఇవ్వవచ్చని పేర్కొంది. కార్పొరేట్ ఎగ్జిక్యూటివ్స్‌కు యావరేజ్ గా 9 శాతం వేతనాల పెంపు ఉండబోతోందని వెల్లడించింది. ఈ మేరకు 'డెలాయిట్ ఇండియా టాలెంట్ ఔట్‌లుక్‌ 2024' పేరిట ఓ నివేదిక విడుదల చేసింది.

కొవిడ్ మహమ్మారి విజృంభణకు ముందుతో పోలిస్తే ఈ సంవత్సరం అన్ని రంగాల్లో ఇంక్రిమెంట్లు బావుంటాయని తేల్చి చెప్పింది. అయితే గత ఏడాది అంచనా వేసిన 9.2 కంటే ఈ దఫా వేతన పెంపు కొంత తక్కువగా ఉండటం గమనార్హం. కాగా ఇందులో IT మరియు BPOలకు మినహాయింపు ఇవ్వడం కొసమెరుపు.

జూనియర్ మేనేజ్‌మెంట్ కు రెండంకెల హైక్ లభించనుందని డెలాయిట్ అభిప్రాయపడింది. అయితే ఆయా సంస్థలు తమ బెల్‌కర్వులో కొంత కఠినంగా వ్యవహరించవచ్చని స్పష్టం చేసింది. తద్వారా టాప్ రేటింగ్స్ పొందడం కష్టమవుతుందని హెచ్చరించింది. కానీ సగటు కంటే తక్కువ రేటింగ్ ఉన్న ఉద్యోగులకు గతేడాది 0.6 రెట్లు హైక్ రాగా ఇప్పుడది 0.4 రెట్లకు తగ్గుతుందని వివరించింది.