Defence Stocks: ఎదురు తిరిగిన ఇన్వెస్టర్స్.. ఆ 4 డిఫెన్స్ స్టాక్స్ మీ దగ్గర ఉంటే జాగ్రత్త..!!

Defence Shares: ఇటీవలి కాలంలో ఈక్విటీ మార్కెట్లతో పాటు మ్యూచువల్ ఫండ్లలో సైతం డిఫెన్స్ రంగానికి చెందిన షేర్ల కొనుగోలుకు ఇన్వెస్టర్లు ఎక్కువగా ఆసక్తి చూపుతున్నారు. భారత ప్రభుత్వం దేశీయ సంస్థలను ప్రోత్సహించటంతో పాటు విదేశాలకు ఎగుమతి చేసే స్థాయికి కంపెనీలు ఎదగటంతో రిటైల్ ఇన్వెస్టర్లు ఉత్సాహంగా కొనుగోళ్లు చేపట్టారు.

అయితే ప్రస్తుతం పరిస్థితుల్లో మార్పు కనిపిస్తోంది. నేడు ఇంట్రాడేలో డిఫెన్స్ కేటగిరీలోని కంపెనీల షేర్లు బేర్స్ చేతిలో చిక్కి క్షీణతను చూశాయి. ఈ క్రమంలో మజాగాన్ డాక్ షిప్‌బిల్డర్స్ లిమిటెడ్ షేర్లు ఈరోజు 9 శాతానికి పైగా పడిపోయాయి. మంగళవారం ఉదయం కొచ్చిన్ షిప్‌యార్డ్స్, గార్డెన్ రీచ్ షేర్లు సైతం పతనాన్ని చూశాయి. మంచి ఆర్డర్ బుక్‌తో పాటు జూన్ త్రైమాసిక ఫలితాలు బలంగా వచ్చినప్పటికి డిఫెన్స్ స్టాక్ మజాగాన్ డాక్ పతనాన్ని చూశాయి. ఐసీఐసీఐ సెక్యూరిటీస్ కంపెనీ షేర్లకు Sell రేటింగ్ అందించింది. కంపెనీ ప్రస్తుత వాల్యుయేషన్ కారణంగా నిర్మల్ బ్యాంగ్ ఇన్‌స్టిట్యూషనల్ ఈక్విటీస్ సైతం మజాగాన్ డాక్‌ షేర్లకు సెల్ రేటింగ్ అందించింది.

ఈ క్రమంలో డిఫెన్స్ కేటగిరీకి చెందిన మరో స్టాక్ కొచ్చిన్ షిప్‌యార్డ్ లిమిటెడ్ కూడా భారీ క్షీణతను చూసింది. బీఎస్ఈలో కంపెనీ షేర్లు రూ.2,153.95 స్థాయిలో ప్రారంభమై తర్వాత నష్టాల నుంచి రికవర్ అయ్యాయి. ఇంట్రాడే గరిష్ఠ స్థాయి నుంచి కొచ్చిన్ షిప్‌యార్డ్ షేర్లు 5.73 శాతం క్షీణించి రూ.2,039.50 స్థాయికి చేరుకోవటం ఇన్వెస్టర్లను ఆందోళనకు గురిచేసింది. అలాగే నేడు గార్డెన్ రీచ్ షిప్‌బిల్డర్స్ & ఇంజనీర్స్ లిమిటెడ్ షేర్లు పేలవ పనితీరును కనబరిచాయి. బీఎస్ఈలో డిఫెన్స్ స్టాక్ రూ.1,900.95 స్థాయిలో క్షీణతతో ప్రారంభమై తర్వాత 9.67 శాతం పతనాన్ని చూశాయి. దీంతో స్టాక్ ధర రూ.1,751.60 స్థాయికి దిగజారాయి.

ఇక చివరిగా ఇన్వెస్టర్లను నిరాశపరిచిన డిఫెన్స్ కేటగిరీ కంపెనీల్లో నేడు పారాస్ డిఫెన్స్ కూడా నిలిచింది. గడచిన రెండు ట్రేడింగ్ సెషన్లలో కంపెనీ షేర్లు అప్పర్ సర్క్యూట్‌ను తాకాయి. కానీ నేడు కంపెనీ షేర్లలో క్షీణత నెలకొంది. కంపెనీ ఇంట్రాడే గరిష్ట స్థాయి ధర రూ.1,323.95 నుంచి 7 శాతానికి పైగా పడిపోటంపై ఇన్వెస్టర్లు నిరాశగా ఉన్నారు.