defence news: BELతో రక్షణ శాఖ ఒప్పందాలు.. స్వదేశీ తయారీతో పాటు ఉద్యోగాల కల్పనకూ ప్రోత్సాహం..

defence news: భారత రక్షణ రంగం అవసరాలు, ఆయుధాల కోసం గతంలో విదేశాలపై విపరీతంగా ఆధారపడే వాళ్లం. కానీ మారుతున్న కాలానికి అనుగుణంగా ఈ విభాగంలో స్వయం సమృద్ధి దిశగా మోడీ నేతృత్వంలోని కేంద్రం అడుగులు వేసింది. తద్వారా ఆయా ఉత్పత్తులను దేశీయంగా తయారు చేస్తూ, ప్రభుత్వ రంగం సంస్థలు దూసుకుపోతున్నాయి.

3 వేల కోట్లతో 2 ఒప్పందాలు:
వైమానిక దళం(IAF) సామర్థ్యాన్ని పెంపొందించే రాడార్లు, రిసీవర్ల కోసం భారత్ ఎలక్ట్రానిక్స్ లిమిటెడ్‌(BEL) తో రక్షణ మంత్రిత్వ శాఖకు అంగీకారం కుదిరింది. ఈ మేరకు 3 వేల 7 వందల కోట్ల విలువైన రెండు ఒప్పందాలపై సంతకాలు జరిగాయి. మీడియం పవర్ రాడార్లు 'ఆరుద్ర' సరఫరా కోసం 2 వేల 8 వందల కోట్లు, 129 DR-118 రాడార్ వార్నింగ్ రిసీవర్ల కోసం 950 కోట్లను ప్రభుత్వం ఖర్చు చేయనుంది.

స్వదేశంలోనే రూపకల్పన, తయారీ:
రెండు ప్రాజెక్టులూ 'Buy Indian-IDMM' కింద స్వదేశంలో రూపకల్పన చేసి అభివృద్ధి చేయబడినవి కావడం విశేషం. వైమానిక దళానికి సంబంధించిన నిఘా, గుర్తింపు, ట్రాకింగ్, ఎలక్ట్రానిక్ వార్‌ ఫేర్ సామర్థ్యాలను పెంపొందించే లక్ష్యంతో వీటిని డిజైన్ చేశారు. MPR (ఆరుద్ర) రాడార్‌ను డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్ (DRDO) రూపొందించగా.. BEL తయారు చేస్తోంది. వీటిపై IAF ఇప్పటికే విజయవంతంగా ట్రయల్స్ నిర్వహించింది.

భారత పరిశ్రమలకు ప్రోత్సాహం:
ఆత్మనిర్భర్ భారత్ స్ఫూర్తితో రక్షణ రంగ తయారీలో స్వావలంబన దిశగా దేశం ప్రయాణించడానికి ఇవి సహాయపడతాయని భారత వైమానిక దళం ఒక ప్రకటనలో తెలిపింది. MSMEలు సహా ఇండియన్ ఎలక్ట్రానిక్స్ మరియు అనుబంధ పరిశ్రమల భాగస్వామ్యాన్ని ఈ ప్రాజెక్టులు ప్రోత్సహిస్తాయని పేర్కొంది. వీటి ద్వారా మూడున్నరేళ్ల కాలంలో దాదాపు 2 లక్షల పనిదినాల ఉపాధిని కల్పించవచ్చని అంచనా వేస్తున్నట్లు వెల్లడించింది.