Andhra ACs: మార్కెట్‌లోకి మేడిన్ ఆంధ్రా ACలు.. వెయ్యి కోట్ల కంపెనీ ఉత్పత్తి ప్రారంభం

ఉభయ తెలుగు రాష్ట్రాల్లో ఉద్యోగాల కల్పన గురించి వాడీవేడిగా చర్చ జరుగుతోంది. ఇరు ప్రాంతాల్లో ఎన్నికల హాట్ మొదలైన వేళ.. ప్రతిపక్షాలు ఆయా ప్రభుత్వాలపై దుమ్మెత్తిపోస్తున్నాయి. ఆంధ్రాలో అయితే కొత్త కంపెనీల రాక సంగతి తరువాత, ఉన్నవాటిని సైతం జగన్ సర్కారు తరిమేస్తోందని విమర్శలు గుప్పిస్తున్నాయి.

ఈ తరహా విమర్శలకు వైకాపా ప్రతినిధులు కౌంటర్ ఇస్తున్నప్పటికీ.. తమ వాణిని అంత బలంగా వినిపించడం లేదనే వాదన విశ్లేషకుల్లో వినిపిస్తోంది. వెయ్యి కోట్ల కంపెనీ ఆంధ్రాలో నిర్మాణం పూర్తి చేసుకుని ఉత్పత్తిని సైతం ప్రారంభించగా.. కనీసం ప్రచారం చేసుకోవడంలో రాష్ట్ర ప్రభుత్వం విఫలమైందని ఆరోపిస్తున్నారు.

పొట్టి శ్రీరాములు నెల్లూరు జిల్లా శ్రీ సిటీలోని 75 ఎకరాల్లో ప్రముఖ ఎయిర్ కండీషనింగ్ ప్రొడక్ట్స్ తయారీదారు డైకిన్ తన యూనిట్ నెలకొల్పింది. 2023 చివరి నాటికి దేశంలోని తన మూడవ ప్లాంట్‌లో ప్రొడక్షన్ మొదలెట్టేందుకు ప్రణాళికలు రచించింది. దాదాపు వెయ్యి కోట్లు ఇన్వెస్ట్‌ చేసిన ఈ కంపెనీ.. రికార్డు స్థాయిలో 18 నెలల్లోనే తన యూనిట్‌ను రెడీ చేసింది. లాంఛనంగా ఇవాళ వాణిజ్య ఉత్పత్తిని ప్రారంభించింది.

పెరుగుతున్న ఎయిర్ కండీషనర్స్ డిమాండ్‌ను తీర్చేందుకు.. తొలిదశలో ఏటా 10 లక్షల మేడిన్ ఆంధ్రా ACలను ఉత్పత్తి చేయనున్నట్లు డైకిన్ యాజమాన్యం ప్రకటించింది. దీనిద్వారా ప్రత్యక్షంగా 3 వేల మందికి ఉపాధి లభిస్తుందని తెలిపింది. అయితే ఇప్పటికే 2020-21లో డిప్లమో పూర్తి చేసుకున్న విద్యార్థులకు తమ సంస్థలో శిక్షణ ఇచ్చి ఉపాధి కల్పించినట్లు వెల్లడించింది.