Dabur Share: డాబర్ షేర్లకు ఎదురుదెబ్బ.. 3% పడిపోయిన షేర్ విలువ..

Dabur Share: ఈ రోజు మార్కెట్లో డాబర్ ఇండియా షేర్లు నష్టపోయాయి. అయితే దీనికి ఒక కారణం ఉంది. అయితే ప్రమోటర్స్ బర్మన్ కుటుంబం బ్లాక్ డీల్ ద్వారా మంగళవారం రూ.800 కోట్ల విలువైన షేర్లను విక్రయిస్తున్నట్లు వార్తలు రావటంతో షేర్లు నష్టాన్ని చవిచూశాయి.

దేశంలో అత్యంత వేగంగా అభివృద్ధి చెందుతున్న కన్జూమర్ గూడ్స్ కంపెనీగా డాబర్ ఇండియా ఉంది. అయితే ప్రమోటర్ల కుటుంబం షేర్లను సోమవారం ముగింపు ధర కంటే 4 శాతం తక్కువకు విక్రయించాలని నిర్ణయించినట్లు తెలిసింది. ఈ క్రమంలో కరెక్షన్ అయిన స్టాక్ ధర రూ.589.05 వద్ద ముగిసింది.

సెప్టెంబర్ 30 డేటా ప్రకారం డాబర్ ఇండియా లిమిటెడ్ ప్రమోటర్లైన బర్మన్ కుటుంబానికి కంపెనీలో మొత్తం 67.24 శాతం వాటా ఉంది. డాబర్ ఇండియా బ్లాక్ డీల్‌కు గోల్డ్‌మన్ సాచ్స్ బ్రోకర్ గా ఉన్నట్లు తెలుస్తోంది. 2022లో ఎఫ్‌ఎంసీజీ సెగ్మెంట్‌లో తక్కువ పనితీరు కనబరుస్తున్న వారిలో డాబర్ ఇండియా కూడా ఒకటిగా ఉంది. 19 డిసెంబర్ 2022 నాటికి డాబర్ ఇండియా షేర్లు కేవలం 1.5 శాతం మాత్రమే లాభపడ్డాయి.

ఇప్పటికే భారత ఎఫ్‌ఎంసీజీ రంగంలోకి రిలయన్స్ రిటైల్, అదానీ గ్రూప్, టాటా గ్రూప్ ప్రవేశించాయి. ఇదే రంగంలో ఉన్న విప్రో సైతం కొత్తగా కేరళకు చెందిన ఒక ఆహార కంపెనీని కొనుగోలు చేసింది. రిలయన్స్ సైతం ఇండిపెండెన్స్ పేరుతో ఒక బ్రాండ్ ను త్వరలోనే భారత మార్కెట్లోకి అరంగేట్రం చేస్తోంది. ఈ పోటీని తట్టుకునేందుకు డాబర్ మసాలా దినుసుల తయారీదారు బాద్ షా లో 51 శాతం వాటాలను కొనుగోలు చేసింది. ఈ షేర్లను మార్చి 31, 2023 నాటికి బదిలీ చేయాలని లక్ష్యంగా పెట్టుకున్నారు.

డాబర్ కంపెనీ దేశంలో ఆయుర్వేద ఉత్పత్తులు, ఆరోగ్య సంరక్షణ, హెయిర్ కేర్, చర్మ సంరక్షణ, టూత్‌పేస్ట్, గృహ సంరక్షణ, ఆరోగ్య సంబంధిత ఉత్పత్తులను మాత్రమే తయారు చేసి విక్రయిస్తోంది.