Crypto Today: పుంజుకున్న క్రిప్టో, కానీ 30,000 డాలర్లకు దిగువనే బిట్ కాయిన్

క్రిప్టో మార్కెట్ నేడు సానుకూలంగా కదలాడుతోంది. ప్రపంచ అతిపెద్ద క్రిప్టో కరెన్సీ బిట్ కాయిన్‌తో పాటు మీమ్ కాయిన్స్ డోజీకాయిన్, షిబా ఇను కూడా రెండు శాతం, అంతకంటే ఎక్కువగా లాభపడ్డాయి. గత కొంతకాలంగా క్రిప్టోలు నష్టాల్లో ఉన్నాయి. కొద్ది రోజుల క్రితం 40,000కు పైగా ఉన్న బిట్ కాయిన్, ఇప్పుడు 30,000కు దిగువన ట్రేడ్ అయింది. ఓ సమయంలో 28,000 డాలర్ల స్థాయికి పడిపోయినప్పటికీ నేడు కాస్త పుంజుకొని, 30,000 డాలర్లకు సమీపంలో ఉంది. ఎథేరియం నేడు 2000 డాలర్లు క్రాస్ చేసింది.

బిట్ కాయిన్ నేడు 2.06 శాతం లాభపడి 29,868 పాయింట్ల వద్ద ట్రేడ్ అయింది. గత ఇరవై నాలుగు గంటల్లో 29,156 డాలర్ల వద్ద కనిష్టాన్ని, 30,275 డాలర్ల వద్ద గరిష్టాన్ని తాకింది. బిట్ కాయిన్ మార్కెట్ క్యాప్ నేడు 568.69 బిలియన్ డాలర్లు పెరిగింది. బిట్ కాయిన్ ఆల్ టైమ్ గరిష్టం 68,990.90 డాలర్లు కాగా, కనిష్టం 25,402.04 డాలర్లు.

వివిధ క్రిప్టో కరెన్సీ విషయానికి వస్తే బిట్ కాయిన్ 3 శాతం, ఎథేరియం 3.34 శాతం, ఎక్స్‌ఆర్‌పీ 2.30 శాతం, సోలానా 5.41 శాతం, క్రిప్టో డాట్ కామ్ 4.14 శాతం, కార్డానో 3.92 శాతం, స్టెల్లార్ 7.01 శాతం, అవాలాంచె 7.26 శాతం, పోల్కాడాట్ 5.20 శాతం, డోజీకాయిన్ 2.83 శాతం లాభపడ్డాయి. నేటి టాప్ గెయినర్స్ జాబితాలో లూనా ఏకంగా 93 శాతం ఎగిసిపడింది. ఆ తర్వాత ఔగుర్ 35 శాతం, టెర్రా యూఎస్డీ 22 శాతం, టాప్ లూజర్స్ జాబితాలో ఉమా ప్రోటోకాల్ 6 శాతం ఉన్నాయి.