20,000 డాలర్ల దిగువకు పడిపోయిన బిట్ కాయిన్, క్రిప్టో మహా పతనం... నేడు కాస్త ఊరట

క్రిప్టో మార్కెట్ భారీగా పతనమైంది. నేడు (జూన్ 19, 2022) ఈ కరెన్సీ కాస్త పుంజుకున్నప్పటికీ భారీ నష్టాల్లోనే ఉంది. ప్రపంచ అతిపెద్ద క్రిప్టో బిట్ కాయిన్ ఏకంగా 20,000 డాలర్లకు దిగువనే ఉంది. ఓ సమయంలో 17,000 డాలర్ల స్థాయికి పడిపోయింది. రెండో అతిపెద్ద క్రిప్టో ఎథేరియం ఓ సమయంలో 880 డాలర్లకు పడిపోయినప్పటికీ, కాస్త పుంజుకొని 1051 డాలర్లకు చేరుకుంది. ఆల్ టైమ్ గరిష్టంతో ఐదింట నాలుగు రెట్లు పతనమైంది.

బిట్ కాయిన్ ఆల్ టైమ్ గరిష్టం 68,990 డాలర్లు. 52 వారాల గరిష్టం కూడా ఇదే. అయితే 52 వారాల కనిష్టం మాత్రం నిన్నటిది మాత్రమే. ఈ వార్త రాసే సమయానికి బిట్ కాయిన్ 1.41 శాతం ఎగిసి 19,633 డాలర్ల వద్ద కదలాడింది. 24 గంటల కనిష్టం 17,601 డాలర్లు కాగా, 24 గంటల గరిష్టం 19,918 డాలర్లు. ఎథేరియం గత ఇరవై నాలుగు గంటల్లో 880 డాలర్ల వద్ద కనిష్టాన్ని తాకింది. ఈ వార్త రాసే సమయానికి 1050 డాలర్ల వద్ద ట్రేడ్ అయింది.

క్రిప్టో కరెన్సీ వ్యాల్యూ విషయానికి వస్తే బిట్ కాయిన్ 1.40 శాతం, ఎథేరియం 4.34 శాతం, బియాన్స్ కాయిన్ 0.29 శాతం, ఎక్స్‌ఆర్పీ 1.62 శాతం, సోలానా 7.5 శాతం, స్టెల్లార్ 5.33 శాతం, పోల్కాడాట్ 6.06 శాతం, డోజీకాయిన్ 6.81 శాతం లాభపడ్డాయి. భారీగా లాభపడిన వాటిలో పోల్కాస్టార్టర్ 25 శాతం, ఆరోగాన్ 18 శాతం, స్టోర్జ్ 15.5 శాతం, ఏప్ కాయిన్ 14 శాతం లాభపడ్డాయి. టాప్ లూజర్స్ జాబితాలో క్విక్ స్వాప్ 5 శాతం, పాలీగోన్ 4 శాతం నష్టపోయాయి.