Crypto Crash: భారీగా పతనమైన క్రిప్టో కరెన్సీ, బిట్ కాయిన్ 5% డౌన్

క్రిప్టో మార్కెట్ భారీగా పడిపోయింది. పాక్స్ గోల్డ్, బియాన్స్ యూఎస్టీ, పాక్సోస్ డాలర్ వంటి చిన్నా చితక క్రిప్టో కరెన్సీలు మినహా అన్ని కూడా నష్టాల్లోనే ఉన్నాయి. అతిపెద్ద క్రిప్టోలు 5 శాతం నుండి 12 శాతానికి పైగా నష్టపోయాయి. దీంతో గ్లోబల్ క్రిప్టో మార్కెట్ క్యాపిటలైజేషన్ ఎనిమిది శాతం లేదా 1.10 ట్రిలియన్ డాలర్లు పతనమైంది. కేంద్ర బ్యాంకులు వడ్డీ రేట్ల పెంపు, కరోనా కేసులు పెరగడం వంటి వివిధ కారణాలు ఇందుకు దోహదపడ్డాయి.

ప్రపంచ అతిపెద్ద క్రిప్టో బిట్ కాయిన్ ఈ వార్త రాసే సమయానికి 5.25 శాతం క్షీణించి 27,496 డాలర్ల వద్ద ట్రేడ్ అయింది. ఓ సమయంలో 29,000 డాలర్ల దిగువకు వెళ్తున్న సంకేతాలు కనిపించాయి. కానీ కాస్త కోలుకున్నప్పటికీ, భారీ నష్టాల్లోనే ఉంది. గత 24 గంటల్లో బిట్ కాయిన్ 27,167 డాలర్ల వద్ద కనిష్టాన్ని, 29,019 డాలర్ల వద్ద గరిష్టాన్ని తాకింది. బిట్ కాయిన్ 52 వారాల్లో 25,402 డాలర్ల వద్ద కనిష్టాన్ని, 68,990 డాలర్ల వద్ద గరిష్టాన్ని తాకింది.

వివిధ క్రిప్టో కరెన్సీ వ్యాల్యూ విషయానికి వస్తే బిట్ కాయిన్ 5 శాతం, ఎథేరియం 7 శాతం, బియాన్స్ కాయిన్ 9 శాతం, ఎక్స్‌ఆర్‌పీ 8.62 శాతం, కార్డానో 12 శాతం, సోలానా 10 శాతం, క్రిప్టో డాట్ కామ్ 10 శాతం, స్టెల్లార్ 8.58 శాతం, పోల్కాడాట్ 10.88 శాతం, డోజీకాయిన్ 11.66 శాతం, అవాలాంచె 16.30 శాతం, షిబా ఇను 12 శాతం నష్టపోయాయి. టాప్ లూజర్స్ విషయానికి వస్తే బ్యాండ్ ప్రోటోకాల్ ఏకంగా 25 శాతం, న్యూసైఫర్ 24 శాతం, ఫాంటోమ్ 22 శాతం, ఏప్ కాయిన్ 21 శాతం, పోల్కాస్టార్టర్ 20 శాతం క్షీణించాయి.