పెట్రోల్, డీజిల్ ధరలు భారీగా తగ్గే అవకాశం.. 80 డాలర్ల దిగువకు పడిపోయిన ముడి చమురు ధర..

అమెరికా, ఇరాన్‌ల మధ్య కొనసాగుతున్న దౌత్యపరమైన చర్చలు, హార్ముజ్ జలసంధిని తిరిగి తెరవడానికి జరుగుతున్న ముమ్మర ప్రయత్నాల కారణంగా అంతర్జాతీయ మార్కెట్‌లో ముడి చమురు ధరలు భారీగా పడిపోయాయి. ప్రపంచ మార్కెట్‌లో ముడి చమురు ధరలు ఒకే రోజు బ్యారెల్‌కు 80 డాలర్ల కంటే దిగువకు పడిపోవడం విశేషంగా చెప్పుకోవచ్చు. గత మూడు వారాల కాలంలో ముడి చమురు ధరలు ఇంత కనిష్ట స్థాయికి చేరుకోవడం ఇదే మొదటిసారి.

అంతర్జాతీయ ప్రామాణికమైన బ్రెంట్ క్రూడ్ ధర సుమారు 5.9 శాతం మేర తగ్గి బ్యారెల్‌కు 79.06 డాలర్ల వద్దకు పడిపోగా.. డబ్ల్యూటీఐ క్రూడ్ కూడా దాదాపు 6.2 శాతం మేర క్షీణించి బ్యారెల్‌కు 75.20 డాలర్ల వద్ద నిలిచింది. అంతర్జాతీయ మార్కెట్‌ల ప్రభావంతో భారతదేశ మల్టీ కమోడిటీ ఎక్స్ఛేంజ్‌లో ముడి చమురు లావాదేవీలు బ్యారెల్‌కు సుమారు రూ. 7,860 వద్ద ప్రారంభమయ్యాయి. ఇది మునుపటి సెషన్‌తో పోలిస్తే నేరుగా రూ.177 తగ్గుదలను నమోదు చేసింది.

ఈ అనూహ్య ధరల పతనానికి ప్రధాన కారణం హార్ముజ్ జలసంధి గుండా నౌకల రాకపోకలను మళ్లీ పునరుద్ధరించే అవకాశాలు స్పష్టంగా కనిపిస్తుండటమేనని చెప్పవచ్చు. అమెరికా విదేశాంగ మంత్రి మార్కో రూబియో, ఆర్థిక మంత్రి స్కాట్ బెస్సెంట్ అందించిన వివరాల ప్రకారం.. ఈ వ్యూహాత్మక జలసంధిలో నౌకల సురక్షిత ప్రయాణాన్ని పునరుద్ధరించడానికి ఇరాన్, ఒమన్‌లతో జరుపుతున్న చర్చలు సానుకూల దిశలో సాగుతున్నాయి.

Also Read

వాహనదారులకు గుడ్ న్యూస్..పెట్రోల్, డీజిల్ ధరలు భారీగా తగ్గే అవకాశం.. తగ్గిన ముడిచమురు ధరలు

ఈ దౌత్య ప్రక్రియలో ఖతార్ ఎమిర్ షేక్ తమీమ్ బిన్ హమద్ అల్ థానీ అత్యంత కీలకమైన మధ్యవర్తిగా వ్యవహరిస్తున్నారు. ఇరాన్‌పై దాడులను నిలిపివేసి, వ్యూహాత్మక చర్చలకు రావాలని అమెరికా అధ్యక్షుడు డొనాల్డ్ ట్రంప్‌కు ప్రతిపాదించింది ఆయనే. ఈ పురోగతి ఫలితంగానే ఇరు దేశాలు పరస్పరం ముసాయిదా ఒప్పందాలను మార్చుకోవడం ప్రారంభించాయి. మరోవైపు ఇరాన్ విదేశాంగ మంత్రిత్వ శాఖ ప్రకటన ప్రకారం.. ఒమన్‌తో కూడా ప్రత్యేక చర్చలు జరుగుతున్నాయి. హార్ముజ్ జలసంధి ద్వారా వాణిజ్య నౌకలు సురక్షితంగా వెళ్లేందుకు వీలుగా ఒక తాత్కాలిక మార్గాన్ని ఏర్పాటు చేసేందుకు ఒప్పందం కుదుర్చుకునే దిశగా ఈ సంభాషణలు సాగుతున్నాయి.

అంతర్జాతీయంగా ముడి చమురు ధరలు పడిపోవడం భారతదేశ ఆర్థిక వ్యవస్థకు ఎంతో శుభవార్తగా మారింది. ప్రపంచంలోనే మూడో అతిపెద్ద చమురు దిగుమతిదారుగా ఉన్న భారత్, తన చమురు అవసరాల కోసం విదేశాలపైనే ఎక్కువగా ఆధారపడుతోంది. అందువల్ల చమురు ధర బ్యారెల్‌కు 79 డాలర్లకు పడిపోవడం వల్ల భారత విదేశీ మారక ద్రవ్య నిల్వలపై భారం గణనీయంగా తగ్గుతుంది. సాధారణ లెక్కల ప్రకారం.. క్రూడ్ ఆయిల్ ధరలో ప్రతీ ఒక డాలర్ తగ్గినా, భారతదేశ దిగుమతి బిల్లు సుమారు పదివేల కోట్ల రూపాయల వరకు తగ్గుతుంది.

ఈ ధరల తగ్గుదల ప్రభావం దేశీయంగా సాధారణ ప్రజలకు కూడా ప్రత్యక్ష ఉపశమనాన్ని కలిగిస్తుంది. చవకగా ముడి చమురు లభించడం వల్ల రవాణా, లాజిస్టిక్స్ రంగానికి అయ్యే ఖర్చులు బాగా తగ్గుతాయి. దేశంలో సరుకుల రవాణా వ్యయం తగ్గితే.. పండ్లు, కూరగాయలు, తదితర నిత్యావసర వస్తువుల ధరలు అదుపులోకి వచ్చి ద్రవ్యోల్బణం తగ్గుతుంది. అంతేకాకుండా అంతర్జాతీయ మార్కెట్‌లో ఇవే తక్కువ ధరలు మరో కొన్ని వారాల పాటు స్థిరంగా కొనసాగితే.. దేశీయ చమురు సంస్థలు వినియోగదారులకు లబ్ధి చేకూరుస్తూ పెట్రోల్, డీజిల్ చిల్లర ధరలను గణనీయంగా తగ్గించే అవకాశం ఎంతైనా ఉంది.