Gowtham Adani: కొత్తగా ఈ వ్యాపారంపై అదానీ కన్ను.. రూ.41,000 కోట్ల భారీ పెట్టుబడి.. ప్రభుత్వం గ్రీన్ సిగ్నల్..

Gowtham Adani: ఆసియాలోనే అత్యంత సంపన్నుడు గౌతమ్ అదానీ తన వ్యాపార సామ్రాజ్యాన్ని విస్తరిస్తున్న వేగం ఎవరికైనా ఆశ్చర్యం కలిగించక మానదు. ఆయన చేయని వ్యాపారం లేదు అనటం అతిశయోక్తి కాదు. ఎందుకంటే ఇప్పుడు అదానీ తన సామ్రాజ్యానికి మరో వ్యాపారాన్ని జోడించాలనుకుంటున్నారు.

అల్యూమినియం వ్యాపారంలోకి..

అదానీ అల్యూమినియం రిఫైనరీని ఏర్పాటు చేయాలని యోచిస్తున్నారు. దీనికోసం అదానీ ఎంటర్‌ప్రైజెస్ తూర్పు భారతదేశంలోని ఒరిస్సాలో అల్యూమినియం రిఫైనరీని ఏర్పాటు చేయబోతోంది. ఈ ప్రాజెక్ట్ కోసం కంపెనీ దాదాపు రూ.41,000 కోట్లను పెట్టుబడిగా పెట్టాలని ప్లాన్ చేసింది. ఒడిశా ముఖ్యమంత్రి నవీన్‌ పట్నాయక్‌ కార్యాలయం బుధవారం ఓ ట్వీట్‌ చేశారు. ఈ ట్వీట్ ప్రకారం.. రాయగడలో రిఫైనరీ, క్యాప్టివ్ పవర్ ప్లాంట్ ఏర్పాటుకు అదానీ ఎంటర్‌ప్రైజెస్ కు ఆమోదం లభించింది.

అల్యూమినియం..

అదానీ ఎంటర్‌ప్రైజెస్ ఏర్పాటు చేయనున్న అల్యూమినియం రిఫైనరీ వార్షిక సామర్థ్యం 4 మిలియన్ టన్నులు. ఈ లోహాన్ని అల్యూమినియం ఆక్సైడ్ అని కూడా అంటారు. ఇది అల్యూమినియం అండ్ ఆక్సిజన్ రసాయన సమ్మేళనం ద్వారా ఏర్పడే మెటల్. అయితే.. ఈ రిఫైనరీకి సంబంధించి అదానీ ఎంటర్‌ప్రైజెస్ ఇంకా ఎలాంటి ప్రకటన చేయలేదు.

మెటల్ రంగం గురించి..

ఈ సంవత్సరం ప్రారంభంలో స్టీల్, కాపర్ ప్లాంట్ల ప్రకటన తర్వాత.. అదానీ గ్రూప్ తాజాగా మెటల్ రంగంలోకి వేగంగా అడుగులు వేస్తూ ముందుకు సాగుతోంది. అదానీ ఎంటర్‌ప్రైజెస్ జనవరిలో దక్షిణ కొరియా స్టీల్ మేజర్ పోస్కోతో భాగస్వామ్యాన్ని ప్రకటించింది. వారిద్దరూ దేశంలో గ్రీన్ స్టీల్ ప్లాంట్లను నెలకొల్పాలని ప్లాన్ చేస్తున్నారు.

ముద్ర అల్యూమినియం పేరుతో..

గౌతమ్ అదానీ ముద్ర అల్యూమినియం లిమిటెడ్ అనే అనుబంధ కంపెనీని కూడా స్థాపించారు. ఆయన మెటల్ రంగంపై చాలా ఉత్సాహంగా ఉన్నారని, దానిలో తన వ్యాపారాన్ని విస్తరించాలనుకుంటున్నారని ఇది సూచిస్తుంది. ప్రస్తుతం భారత మెటల్ రంగం గురించి మాట్లాడుకున్నట్లయితే.. వేదాంత రిసోర్సెస్ లిమిటెడ్, ఆదిత్య బిర్లా గ్రూప్‌ల ఈ రంగంలో తమ ఆధిపత్యాన్ని కలిగి ఉన్నాయి.

డైవర్సిఫైయింగ్ గ్రూప్ బిజినెస్..

అదానీ గ్రూప్ తన వ్యాపారాన్ని వేగంగా విస్తరించింది. గ్రూప్ తన వ్యాపారాన్ని అగ్రి ట్రేడింగ్, పోర్ట్స్, విమానాశ్రయాలు, డేటా సెంటర్స్, పునరుత్పాదక ఇంధనం, సిమెంట్, పవర్ ట్రాన్స్ మిషన్ ఇలా అనేక రంగాల్లో వ్యాపారాలను నిర్వహిస్తూ తాజాగా మెటల్ రంగంలోని అడుగు పెట్టింది.