MS Dhoni: ధోనీకే గుండు కొట్టిన బిజినెస్ పార్ట్‌నర్స్.. FIR ఫైల్ చేసిన కెప్టెన్ కూల్..

Dhoni Case: భారత మాజీ క్రికెటర్ మహేంద్ర సింగ్ ధోని అటు ఆటగానే కాక ఇటు వ్యాపారవేత్త, ఇన్వెస్టర్‌గా కూడా ప్రసిద్ధి చెందారు. అయితే తనను వ్యాపార భాగస్వాములు మోసం చేశారంటూ ధోనీ కేసు నమోదు చేయటం ప్రస్తుతం సంచలనంగా మారింది.

ఆర్కా స్పోర్ట్స్ మేనేజ్మెంట్‌కు చెందిన మిహిర్ దివాకర్, సౌమ్య విశ్వాస్‌పై ధోనీ రాంచీ కోర్టులో క్రిమినల్ కేసు నమోదు చేశారు. వాస్తవానికి 2017లో వీరి భాగస్వామ్యంతో క్రికెట్ అకాడమీ ఏర్పాటుకు డీల్ జరిగింది. అయితే తాజాగా భాగస్వామి రూ.15 కోట్లు మోసం చేశారంటూ ధోనీ కేసు పెట్టడం క్రికెట్ ప్రపంచంలో కలకలం రేపింది.

ప్రపంచ స్థాయి క్రికెట్ అకాడమీని ఏర్పాటు చేసేందుకు ఎంఎస్ ధోనితో దివాకర్ ఒప్పందం కుదుర్చుకున్నారు. దానికి కొన్ని షరతులు ఉండగా మిహిర్ దివాకర్ వాటిని పాటించలేదు. దివాకర్ ఆర్కా స్పోర్ట్స్ ఫ్రాంచైజీ ఫీజు చెల్లించి లాభాలను పంచుకోవాల్సి ఉంది. అయితే ఈ నిబంధనను పాటించకపోవటం వల్ల ధోనీ భారీగా ఆదాయాన్ని నష్టపోయారు. దీనిపై పదేపదే ప్రస్థావించినప్పటికీ వారిలో మార్పు రాకపోవటంతో ధోనీ 15 ఆగస్టు 2021న ఆర్కా స్పోర్ట్స్‌కు ఇచ్చిన హక్కులను ఉపసంహరించుకుంటున్నట్లు నోటీసులు పంపారు.

లీగల్ నోటీసులు పంపినప్పటికీ ప్రయోజనం లేకుండా పోవటంతో తాజాగా కెప్టెన్ కూల్ కేసు నమోదు చేసి మరో అడుగు ముందుకేశారు. ఆర్కా స్పోర్ట్స్ నిబంధనలు పాటించకుండా చేసిన మోసం వల్ల తనకు దాదాపు రూ.15 కోట్లు నష్టం వాటిల్లిందని పేర్కొన్నారు.