క్రిప్టో ఎక్స్చేంజీల్లో సోదాలు, పెద్ద ఎత్తున పన్ను ఎగవేతల గుర్తింపు

డైరెక్టర్ జనరల్ ఆఫ్ జీఎస్టీ ఇంటెలిజెన్స్(DGGI) దేశవ్యాప్తంగా పలు క్రిప్టో కరెన్సీ ఎక్స్చేంజీలలో సోదాలు నిర్వహించింది. పలుచోట్ల పన్ను ఎగవేతలను గుర్తించింది. ప్రముఖ క్రిప్టో ఎక్స్చేంజీ భారీ మొత్తంలో పన్ను ఎగవేతకు పాల్పడినట్లుగా గుర్తించారు. రూ.40.5 కోట్ల వరకు పన్ను ఎగవేతకు పాల్పడిందని ఎక్స్చేంజ్ వ్యాపార కార్యకలాపాలపై దర్యాప్తు అనంతరం జీఎస్టీ ముంబై జోన్(ఈస్ట్ కమిషనరేట్ జోన్) అధికారులు తెలిపారు. ఎక్స్చేంజ్ ఎగవేసిన పన్ను, దానిపై వడ్డీ, జరిమానా కలిపి మొత్తం రూ.49.20 కోట్ల నగదును గత నెల 30న రికవరీ చేసుకున్నట్లు అధికారులు వెల్లడించారు.

సదరు దిగ్గజ క్రిప్టో ఎజెన్సీ భారీగా పన్ను ఎగవేసినట్లు తేలడంతో DGGI దేశంలోని అన్ని క్రిప్టో కరెన్సీ సేవల కంపెనీల కార్యాలయాల్లో సోదాలు నిర్వహించినట్లు తెలుస్తోంది. ఈ సోదాల్లో మరిన్ని పన్ను ఎగవేతలు అధికారుల దృష్టికి వచ్చినట్లు తెలుస్తోంది.

క్రిప్టోలతోపాటు అత్యాధునిక టెక్నాలజీ ఆధారిత సేవలు అయిన నాన్ ఫంగిబుల్ టోకెన్స్, ఆన్‌లైన్ గేమింగ్ ఇంకా ఈ-కామర్స్ కంపెనీల వ్యాపార కార్యకలాపాలపై ముంబై జోన్ సీజీఎస్టీ అధికారులు దర్యాప్తు చేస్తున్నారు.

ఇటీవల కేంద్ర ప్రభుత్వం క్రిప్టో కరెన్సీ బిల్లు తీసుకువస్తుందనే వార్తల నేపథ్యంలో బిట్ కాయిన్, ఎథేరియం వంటి దిగ్గజ క్రిప్టోలు పతనమైన విషయం తెలిసిందే. దాదాపు అన్ని క్రిప్టోలు క్షీణించాయి. అయితే ఆ తర్వాత కాస్త కోలుకున్నాయి.