కరోనా ఎఫెక్ట్, హాస్పిటాలిటీకి రూ.15,000 కోట్లు, FY22 వృద్ధి అంచనాలు 9.5%: RBI

కరోనా సెకండ్ వేవ్ నేపథ్యంలో ఆర్బీఐ కీలక వడ్డీ రేట్ల విషయంలో కీలక నిర్ణయం తీసుకుంది. రెపో రేటును 4 శాతం, రివర్స్ రెపో రేటును 3.35 శాతంగా ఉంచుతూ నిర్ణయం తీసుకుంది. ఆర్బీఐ గవర్నర్ శక్తికాంత దాస్ నేతృత్వంలో పాలసీ కమిటీ మూడు రోజుల సమావేశంలో ఏకగ్రీవ నిర్ణయాలు తీసుకుంది. ప్రస్తుత ఆర్థిక సంవత్సరంలో దేశ జీడీపీని 9.5 శాతంగా అంచనా వేస్తున్నట్లు శక్తికాంత దాస్ ప్రకటించారు.

గ్రామీణ ప్రాంతంలో వినియోగ సంబంధిత డిమాండ్ బాగుందనే విశ్వాసం వ్యక్తం చేశారు. రుతుపవనాల సకాల ఆగమనం ఇందుకు కారణమన్నారు. ఆర్థిక వృద్ధికి అవసరమైన సంకేతాలు కనిపిస్తున్నాయన్నారు. కరోనా వ్యాక్సీన్ వేగవంతం కావడంతో పాటు ఇప్పటికే ప్రకటించిన పలు ఆర్థిక ప్యాకేజీలు ఇందుకు దోహదపడ్డాయన్నారు. కరోనా నేపథ్యంలో హాస్పిటల్ రంగానికి రూ.15,000 కోట్లను ప్రకటించారు.

కరోనా సమయంలో ఎలా వ్యవహరించాలనే అంశానికి సంబంధించి అటు వ్యక్తులు, ఇటు వాణిజ్య సమూహాలు అలవాటు పడుతున్నట్లు తెలిపారు. క్రూడాయిల్ ధరల పెరుగుదల, డిమాండ్ తగ్గడం ఆందోళన కలిగించే అంశాలని చెప్పారు. సిపిఐ ద్రవ్యోల్భణం పూర్తి ఆర్థిక సంవత్సరానికి 5.1 శాతంగా నమోదు కావొచ్చునని అంచనా వేసింది. జూన్ 17న రూ.40 వేల కోట్ల మేర ప్రభుత్వ సెక్యూరిటీస్‌ను కొనుగోలు చేస్తామన్నారు. విదేశీ కరెన్సీ రిజర్వ్‌లు 600 బిలియన్ డాలర్లకు చేరాయన్నారు. దీంతో అంతర్జాతీయంగా ఏదైనా కరెన్సీ ఒడిదుడుకులతో పాటు ఇతర పరిణామాలను సమర్ధవంతంగా ఎదుర్కోగలమన్నారు.