covid vaccine cost: భారతీయులకు వ్యాక్సినేషన్, ఖర్చు ఎంతంటే?

క‌రోనా సెకండ్ వేవ్‌తో భారత్ అతలాకుతలమవుతోంది. అంతకుముందు 45 ఏళ్లు దాటిన వారికి ఉచితంగా వ్యాక్సినేషన్ అందిస్తామని కేంద్ర ప్రభుత్వం ప్రకటించింది. కేసులు విపరీతంగా పెరుగుతుండటంతో ఇప్పుడు మే ఒక‌టో తేదీ నుండి పద్దెనిమిదేళ్లు నిండిన వారికి వ్యాక్సినేష‌న్ చేప‌ట్టాల‌ని నిర్ణ‌యించింది. అయితే అందరికీ ఉచితంగా వ్యాక్సినేషన్ తమ వల్ల కాదని తేల్చేసింది. ప్రయివేటుగా బహిరంగ మార్కెట్లో వ్యాక్సినేషన్ కొనుగోలు చేయాలని సంకేతాలు ఇచ్చింది. ఇందుకు అనుగుణంగా గ్లోబల్ వ్యాక్సీన్స్ తయారీ సంస్థ సీరం ఇనిస్టిట్యూట్ ఆఫ్ ఇండియా వ్యాక్సీన్ విక్రయ ధరలు ప్రకటించింది.

వ్యాక్సీన్ ఖర్చు

సీరం సంస్థ కేంద్రానికి రూ.150కి వ్యాక్సీన్ సరఫరా చేసింది. కేంద్రం, రాష్ట్రాలతో పాటు ప్రయివేటు ఆసుపత్రులకు వ్యాక్సీన్ సరఫరా చేసింది. తాజాగా కేంద్రానికి రూ.150, రాష్ట్ర ప్రభుత్వాలకు రూ.400కు, ప్రయివేటు ఆసుపత్రులకు రూ.600కు సరఫరా చేస్తామని సీరం సంస్థ ప్రకటించింది.

భారతీయులందరికీ పద్దెనిమిదేళ్లు దాటిన వారికి వ్యాక్సినేషన్ చేయాలంటే రూ.67,193 కోట్లు ఖర్చవుతుందని ఓ అధ్యయనం అంచనా. రాష్ట్ర ప్ర‌భుత్వాలు ఇందులో రూ.46,323 కోట్లు భ‌రించ‌గ‌ల‌వ‌ని తేలింది. కేంద్రం త‌న వాటాగా రూ.20,870 కోట్లు భరించవచ్చు. ఇది దేశ జీడీపీలో 0.36 శాత‌మేన‌ని ఇండియా రేటింగ్స్ అండ్ రీసెర్చ్ (ఇండ్-రా) పేర్కొంది.

వారికి ఉచితం

కేంద్ర ప్ర‌భుత్వ నిర్ణ‌యం ప్ర‌కారం 133.26 కోట్ల మంది జ‌నాభాలో 84.19 కోట్ల మంది వ్యాక్సినేష‌న్‌కు అర్హులు. వ్యాక్సిన్ల ధ‌ర‌లు, సేక‌ర‌ణ‌, వ్యాక్సినేష‌న్ నిర్వ‌హ‌ణ మ‌రింత సౌల‌భ్య‌కరంగా మార్చాల‌ని కేంద్రం నిర్ణ‌యించింది. హెల్త్ కేర్ వర్కర్స్, ఫ్రంట్ లైన్ వర్కర్స్, 45 ఏళ్లు దాటిన వారికి ఉచిత వ్యాక్సినేష‌న్ అని కేంద్రం తెలిపింది. రాష్ట్ర ప్ర‌భుత్వాలు, కేంద్ర పాలిత ప్రాంతాలు అద‌నంగా అవ‌స‌ర‌మైతే నేరుగా ఫార్మా సంస్థ‌ల నుండి కొనుగోలు చేసేందుకు అనుమతించింది.

సెకండ్ డోస్ ఖర్చు

భారత వ్యాక్సీన్ తయారీదారులు వ్యాక్సీన్లను 50 శాతం కేంద్రానికి, మిగతా 50 శాతం రాష్ట్రాలు, ప్రయివేటు ఆసుపత్రులకు అమ్ముకోవడానికి పచ్చజెండా ఊపింది. ఇప్ప‌టి వ‌ర‌కు 21.4 కోట్ల వ్యాక్సిన్ల సేకరణకు సీరం ఇనిస్టిట్యూట్ ఆఫ్ ఇండియా, భార‌త్ బ‌యోటెక్ సంస్థ‌ల‌కు కేంద్రం రూ.5,090 కోట్లు మంజూరు చేసింది. సెకండ్డోస్ వ్యాక్సీన్లకు రూ.400 కోట్లుగా అంచనాలు ఉన్నాయి. ఈ లెక్కన 84.19 కోట్ల మందికి సెకండ్ డోస్ వ్యాక్సినేష‌న్ కోసం రూ.62.103 కోట్లు అవుతుంది. ఇప్ప‌టికే ప‌లు కార్పొరేట్ సంస్థలు తమ సిబ్బందికి వ్యాక్సినేషన్ ఉచితంగా అందిస్తున్నాయి. 18 ఏళ్ల నుండి 44 ఏళ్లు ఉన్న ప్రజలకు పెద్ద మొత్తంలో ఖర్చు అవుతుంది.