మీడియా రంగంలో ఒడిశా సంచలనం.. AI సాంకేతికతో చరిత్ర సృష్టించిన OTV

AI newsreader: మారుతున్న కాలానికి అనుగుణంగా టెక్నాలజీ వినియోగం సైతం విపరీతంగా పెరిగింది. ప్రస్తుత డిజిటల్ యుగంలో AI వినియోగం ప్రపంచాన్ని మొత్తం కుదుపేస్తోంది. ChatGPT రాకతో ఇది మరింత ఎక్కువగా ప్రజల్లోకి చొచ్చుకుపోయింది. తాజాగా ఆర్టిఫిషియల్ ఇంటెలిజెన్స్‌ ను మీడియా రంగంలో వినియోగిస్తుండగా, దేశంలో ఇదే మొదటిసారి కావడం విశేషం.

మీడియా రంగంలో ఆర్టిఫిషియల్ ఇంటెలిజెన్స్ ను ప్రవేశపెట్టడం ద్వారా ఒడిశా చరిత్ర సృష్టించింది. ఒడిశా టెలివిజన్ లిమిటెడ్ AI ఆధారిత న్యూస్ ప్రజెంటర్ లీసాతో వార్తలు చదివించింది. అందులోనూ ఒడియాలో న్యూస్ ప్రజెంట్ చేసిన మొదటి AI ప్రజెంటర్ లీసానే కావడం గమనార్హం.

లీసా కోసం సాంకేతికను అభివృద్ధి చేసే తరుణంలో ట్రాన్సలేషన్ విషయంలో కొన్ని సవాళ్లు తలెత్తినట్లు OTV మేనేజింగ్ డైరెక్టర్ జగి మంగత్ పాండా తెలిపారు. చివరికి గూగుల్ అనువాద సామర్థ్యాన్ని మించి లీసా పట్టు సాధించిందని వెల్లడించారు. న్యూస్ డెలివరీలో ఇదొక సంచలనాత్మక డెవలప్‌మెంట్ గా పేర్కొన్నారు.

ఆర్టిఫిషియల్ ఇంటెలిజెన్స్ మరియు మెషీన్ లెర్నింగ్ టెక్నాలజీల ద్వారా.. ఖచ్చితత్వంతో కూడిన వార్తలను అందించేందుకు లీసా రూపొందించబడినట్లు పాండా చెప్పారు. ప్రస్తుతం ఒడియా, ఇంగ్లీష్ భాషల్లో వార్తలను ప్రసారం చేయగలదని తెలిపారు. భవిష్యత్తులో మరిన్ని భాషలకు లీసా సేవలు విస్తరించాలని భావిస్తున్నట్లు ప్రకటించారు.