Silver: వెండిలాగే కాపర్ కూడా దూసుకుపోతుందా? రాబోయే రోజుల్లో ఇన్వెస్టర్లకు లాభాల పంట పండిస్తుందా?

గత ఏడాది 2025లో వెండి ధరలు (Silver prices) ఏకంగా 150% పైగా పెరిగి ఇన్వెస్టర్లకు కాసుల వర్షం కురిపించాయి. ఇప్పుడు మార్కెట్ నిపుణుల చూపు 'కాపర్' (రాగి) పై పడింది. కాపర్ కూడా వెండి లాగే భారీ ర్యాలీకి సిద్ధమవుతోందా? అసలు ఈ మెటల్ మార్కెట్లో ఏం జరుగుతోంది? మన దేశంలోని ఏ స్టాక్స్ దీని వల్ల లాభపడతాయో ఇప్పుడు వివరంగా తెలుసుకుందాం.

సప్లై ఎందుకు తగ్గుతోంది?

భూమి పొరల్లో రాగి సమృద్ధిగానే ఉన్నప్పటికీ, దానిని వెలికితీసే ప్రక్రియ ఇప్పుడు సవాలుగా మారింది. 2026 ఎకనామిక్ సర్వే రిపోర్ట్ ప్రకారం.. భారత్‌లో రాగి ఉత్పత్తి క్రమంగా తగ్గుతోంది. 2023-24లో 3.78 మిలియన్ టన్నులుగా ఉన్న ఉత్పత్తి.. 2024-25 నాటికి 3.56 మిలియన్ టన్నులకు పడిపోయింది. రాగి ఖనిజం (Copper Ore) నాణ్యత తగ్గడం దీనికి ప్రధాన కారణం. ఒకప్పుడు రాగి శాతం ఎక్కువగా ఉండే గనులు, ఇప్పుడు కేవలం 0.4% నుండి 0.6% దిగుబడిని మాత్రమే ఇస్తున్నాయి. అంటే ఒక్క టన్ను రాగి కోసం లక్షల టన్నుల మట్టిని తవ్వాల్సి వస్తోంది.

డిమాండ్ పెరగడానికి కారణాలేంటి?

కేవలం ఫ్యాన్లు, మోటార్లే కాదు.. ఇప్పుడు ప్రపంచాన్ని ఊపేస్తున్న ఆర్టిఫిషియల్ ఇంటెలిజెన్స్ (AI) డేటా సెంటర్లు, ఎలక్ట్రిక్ వాహనాలు (EVs), సోలార్ ప్యానెల్స్ తయారీలో రాగి పాత్ర కీలకం. ఒక్క 1 గిగావాట్ విండ్ టర్బైన్ తయారీకి దాదాపు 2,866 టన్నుల రాగి అవసరమవుతుంది. ఈ భారీ డిమాండ్ కారణంగానే 2025లో కాపర్ ధరలు సుమారు 32% పెరిగాయి.

గమనించాల్సిన 2 ముఖ్యమైన స్టాక్స్

రాగికి ఉన్న డిమాండ్ దృష్ట్యా మార్కెట్లో రెండు కంపెనీలు కీలకంగా మారాయి:

1. హిందుస్థాన్ కాపర్ లిమిటెడ్ (HCL)

ఇది కేంద్ర ప్రభుత్వ ఆధ్వర్యంలోని 'మినీరత్న' కంపెనీ. భారతదేశంలోని రాగి నిల్వలలో దాదాపు 45% వాటా ఈ కంపెనీకే ఉంది.

• పెర్ఫార్మెన్స్: డిసెంబర్ క్వార్టర్ (Q3 FY26)లో ఈ కంపెనీ లాభం ఏటా ప్రాతిపదికన 149% పెరిగి ₹156 కోట్లకు చేరింది.
• ప్లస్ పాయింట్స్: ఈ కంపెనీ అప్పులు లేనిది (Debt-free) , క్రమం తప్పకుండా 30.1% డివిడెండ్ ఇస్తోంది. ఫారిన్ ఇన్వెస్టర్లు (FIIs) కూడా ఈ కంపెనీలో వాటాలను పెంచుకుంటున్నారు.

2. హిందాల్కో ఇండస్ట్రీస్ లిమిటెడ్

ఆదిత్య బిర్లా గ్రూపుకు చెందిన ఈ కంపెనీ అల్యూమినియం, కాపర్ రంగాల్లో దిగ్గజం.

• రిజల్ట్స్: క్వార్టర్ 3లో కాపర్ విభాగం నుండి వచ్చే ఆదాయం 33% పెరిగింది. అయితే అమెరికాలోని 'నోవెలిస్' ప్లాంట్‌లో జరిగిన అగ్నిప్రమాదం కారణంగా కంపెనీ లాభాలపై కొంత ప్రభావం పడింది.
• భవిష్యత్తు: రాగి ధరలు పెరిగితే హిందాల్కోకి అది పెద్ద ప్లస్ అవుతుంది. అందుకే బ్రోకరేజ్ సంస్థలు ఈ స్టాక్‌పై పాజిటివ్‌గా ఉన్నాయి.

ఇన్వెస్టర్లు ఏం చేయాలి?

కాపర్ స్టాక్స్ ప్రస్తుతం కొంత ఒడిదుడుకులకు లోనవుతున్నాయి. చైనాలో డిమాండ్ తగ్గడం, ఇన్వెంటరీ పెరగడం వంటి కారణాల వల్ల గత వారం ఈ షేర్లు కొంత పడిపోయాయి. కానీ లాంగ్ టర్మ్‌లో ఎలక్ట్రిక్ వాహనాలు, AI వాడకం పెరిగే కొద్దీ కాపర్‌కు తిరుగుండదు. కాబట్టి షేర్లు బాగా పెరిగినప్పుడు కొనేకంటే, మార్కెట్ తగ్గినప్పుడు మంచి వ్యాల్యూ ఉన్న షేర్లను ఎంచుకోవడం ఉత్తమం అని నిపుణులు సూచిస్తున్నారు. హిందుస్థాన్ కాపర్ ప్రభుత్వ అండతో ఉంటే హిందాల్కో ప్రైవేట్ రంగంలో వైవిధ్యమైన బిజినెస్‌తో బలంగా ఉంది.

(గమనిక: ఈ వెబ్‌సైట్‌లోని అంశాలు సంబంధిత వ్యక్తుల లేదా విశ్లేషకుల వ్యక్తిగత అభిప్రాయాలు మాత్రమే. ఇవి " Goodreturns.in లేదా Greynium Information Technologies Private Limited " అధికారిక సలహాలు కావు. ఇందులో సమాచారం యొక్క ఖచ్చితత్వానికి మేము ఎలాంటి గ్యారెంటీ ఇవ్వము. మేము స్టాక్ మార్కెట్ పెట్టుబడి సలహాలు లేదా కొనుగోలు/అమ్మకాల సిఫార్సులు చేయము. ఈ కథనాలు కేవలం అవగాహన కోసం మాత్రమే ఉద్దేశించినవి. కాబట్టి, మీరు ఏదైనా పెట్టుబడి నిర్ణయం తీసుకునే ముందు తప్పనిసరిగా మీ ఆర్థిక సలహాదారుని సంప్రదించి తగిన నిర్ణయం తీసుకోగలరు. ఈ కథనాన్ని కేవలం సమాచారంగా మాత్రమే పరిగణించండి.)