ఆరేళ్ల తర్వాత భారత్‌కు డబుల్ బూస్ట్..దేశ ఆర్థిక వ్యవస్థకు మంచి రోజులు

భారతదేశ ఆర్థిక వ్యవస్థకు మంచి రోజులు కనిపిస్తున్నాయి. జూన్ నెలలో రిటైల్, టోకు ద్రవ్యోల్బణం బాగా తగ్గింది. ఈ గణాంకాలు ఆర్థిక వ్యవస్థకు పెద్ద ఉపశమనం కలిగించేవిగా చెప్పుకోవచ్చు. రిటైల్ ద్రవ్యోల్బణం (Consumer Price Index- CPI ఆధారంగా) ఆరు సంవత్సరాలకు పైగా 2.1 శాతం కనిష్ట స్థాయికి పడిపోయింది. అదే సమయంలో టోకు ద్రవ్యోల్బణం (Wholesale Price Index - WPI ఆధారంగా) సున్నా కంటే 0.13 శాతానికి చేరుకుంది. ఇది ముఖ్యంగా ఆహార ధరల తగ్గుదల వల్ల జరిగింది.ఏకకాలంలో ఈ డబుల్ పతనం భారత ఆర్థిక వ్యవస్థపై అనేక సానుకూల ప్రభావాలను చూపనుంది.

రిటైల్ ద్రవ్యోల్బణం 2.1 శాతానికి తగ్గడం జనవరి 2019 తర్వాత ఇప్పుడేనని చెప్పుకోవచ్చు. అప్పుడు అది 1.97 శాతంగా నమోదైంది. ఈ సంఖ్య గత సంవత్సరం మేలో 2.82 శాతం, జూన్ 2024లో 5.08 శాతం కంటే చాలా తక్కువ. ఈ తగ్గుదలతో ప్రత్యక్షంగా సాధారణ వినియోగదారులకు రోజువారీ వస్తువులు, సేవల ధరలు తగ్గుతున్నాయని అర్థం చేసుకోవచ్చు.

జాతీయ గణాంక కార్యాలయం (NSO) ప్రకారం, కూరగాయలు (జూన్‌లో 22.65% తగ్గుదల), పప్పుధాన్యాలు, మాంసం, చేపలు, తృణధాన్యాలు, చక్కెర, పాలు, దాని సంబందిత ఉత్పత్తులు, సుగంధ ద్రవ్యాలు వంటి ఆహార పదార్థాల ధరలు తగ్గడం వల్ల ఈ తగ్గుదల ప్రధానంగా జరిగింది. ఇది మధ్యతరగతి కుటుంబాల బడ్జెట్‌పై ప్రత్యక్షంగా సానుకూల ప్రభావాన్ని చూపింది. కూరగాయలు గత ఏడాది ఇదే కాలంతో పోలిస్తే 19 శాతం తక్కువ ధరకు లభించగా, పప్పుదినుసులు 12 శాతం తగ్గాయి. మాసం ధరలు తగ్గినప్పటికీ కోడి గుడ్ల ధరలు పెరిగాయి.

ఈ సంవత్సరం టోకు ద్రవ్యోల్బణం రేటు 0.13 శాతం వద్ద సున్నా కంటే తక్కువగా ఉండటం ఇదే మొదటిసారి. గత 14 నెలల్లో ఇదే అత్యల్ప స్థాయి. దీనిని ప్రతి ద్రవ్యోల్బణ పరిస్థితి అని కూడా అంటారు. ఇక్కడ వస్తువుల ధరలు టోకు స్థాయిలో తగ్గుతున్నాయి. ఆహార పదార్థాలు, మినరల్ ఆయిల్స్, ప్రాథమిక లోహాల తయారీ, ముడి పెట్రోలియం, సహజ వాయువు ధరలు తగ్గడం వల్ల ఈ తగ్గింపు ప్రధానంగా జరిగిందని పరిశ్రమ మంత్రిత్వ శాఖ తెలిపింది. ఇది ఉత్పత్తిదారులకు ఇన్‌పుట్ ఖర్చును తగ్గిస్తుంది. ఇది కంపెనీల లాభ మార్జిన్‌ను పెంచడంతో పాటు ఉత్పత్తిని పెంచుతుంది. జూన్ నెలలో ఇంధనం, విద్యుత్ కూడా 2.65 శాతం తగ్గాయి. తయారీ ఉత్పత్తుల ద్రవ్యోల్బణం రేటు 1.97 శాతంగా ఉండగా. ఇది ఉత్పత్తి వ్యయాన్ని తగ్గించడంలో కూడా సహాయపడుతుంది.

ఆర్‌బిఐ తన ద్రవ్య విధానాన్ని నిర్ణయించేటప్పుడు ప్రధానంగా రిటైల్ ద్రవ్యోల్బణం (సిపిఐ)ను పరిగణనలోకి తీసుకుంటుంది. రెండు ప్రధాన ద్రవ్యోల్బణ సూచికలలో ఇంత పెద్ద తగ్గుదల వడ్డీ రేట్లను మరింత తగ్గించడానికి ఆర్‌బిఐకి తగినంత అవకాశాన్ని ఇస్తుంది. ఆర్‌బిఐ గత నెలలో పాలసీ వడ్డీ రేటును 0.50 శాతం తగ్గించింది. ప్రస్తుతం 5.50 శాతం వద్ద ఉంది. ప్రస్తుత గణాంకాలు రాబోయే ద్రవ్య విధాన సమీక్షలలో ఆర్‌బిఐ వడ్డీ రేట్లను మరింత తగ్గించే అవకాశాన్ని పెంచే అవకాశం ఉంది. ఫిబ్రవరి నుండి ఇప్పటివరకు మూడుసార్లు రెపో రేటు తగ్గింపులు జరిగాయి, ఇందులో జూన్‌లో 50 బేసిస్ పాయింట్లు తగ్గించారు

కాగా తక్కువ వడ్డీ రేట్లు రుణాలను చౌకగా చేస్తాయి. ఇది వ్యాపారాలు పెట్టుబడి పెట్టడానికి మరియు వినియోగదారులు ఖర్చు చేయడానికి సులభతరం చేస్తుంది. ఇది ఆర్థిక వృద్ధిని వేగవంతం చేస్తుంది. ద్రవ్యోల్బణంలో ఈ విస్తృత తగ్గుదల ఆర్థిక వ్యవస్థలో ధరల స్థిరత్వానికి సంకేతం. ఇది వినియోగదారులకు, వ్యాపారాలకు ఉపశమనం కలిగించడమే కాకుండా, దీర్ఘకాలిక ఆర్థిక వృద్ధికి బలమైన పునాది వేస్తుంది. అనుకూలమైన బేస్ ప్రభావం మరియు వస్తువుల ధరలలో నిజమైన తగ్గుదల కలయిక ఆర్థిక వ్యవస్థకు సానుకూల దృక్పథాన్ని అందిస్తుంది.