Coca-Cola: భారత స్టార్టప్ కంపెనీలో కోకాకోలా పెట్టుబడులు.. జొమాటో, స్విగ్గీలకు చుక్కలే..!

Coca-Cola: దేశంలోని స్టార్టప్ కంపెనీలు గత కొంత కాలంగా నిధుల కొరతతో సతమతమవుతున్నాయి. ఈ క్రమంలో ప్రపంచ శీతలపానీయాల దిగ్గజం కోకాకోలా ఫుడ్ డెలివరీ రంగంలోని స్టార్టప్ కంపెనీలో తొలిసారిగా పెట్టుబడులు పెట్టింది. అసలు దీనివెనుక ఉన్న అసలు వ్యూహం ఏమిటో ఇప్పుడు తెలుసుకుందాం..

ఫుడ్ డెలివరీ రంగంలో వ్యాపారాన్ని నిర్వహిస్తున్న ప్లాట్‌ఫామ్ థ్రైవ్‌లో మైనారిటీ వాటాను శీతలపానీయాల దిగ్గజం కోకాకోలా కైవసం చేసుకుంది. ఇది కంపెనీ దేశంలో మెుదటి స్టార్టప్ ఇన్వెస్ట్మెంట్ కావటం గమనార్హం. ఇప్పటి వరకు మెక్‌డొనాల్డ్స్ వంటి ఫ్లాంచైజ్ లతో ఒప్పందాలు కుదుర్చుకున్న కంపెనీ.. ఉత్పత్తులను వినియోగదారులకు చేర్చే వ్యూహంలో భారంగా ఆహారంతో జత చేయడాన్ని ముందుకు తెచ్చింది.

కోకాకోలా సెప్టెంబరు 2021లో భారతదేశంలో తన గ్లోబల్ మీల్స్ ప్లాట్‌ఫారమ్ 'కోక్ ఈజ్ కుకింగ్'ని కూడా ప్రారంభించింది. రెస్టారెంట్ల నుంచి ఆహారంతో పాటు తన శీతలపానీయాలను సైతం ఆర్డర్ చేసేలా కస్టమర్లను ప్రోత్సహించటమే దీని లక్ష్యం. ఈ క్రమంలో జొమాటో, స్విగ్గీ వంటి దిగ్గజాలకు పోటీగా అదే రంగంలో ఉన్న థ్రైవ్‌కు మద్దతు ఇచ్చి.. వారి ఫుడ్ డెలివరీ ఛానెల్ ద్వారా వినియోగదారులతో సన్నిహితంగా ఉండటానికి కంపెనీ ఇప్పుడు కొత్త పుష్‌ను రూపొందించడానికి సిద్ధంగా ఉంది.

తాజా పెట్టుబడి ద్వారా కస్టమర్లు థ్రైవ్ యాప్‌లో ఆహారాన్ని ఆర్డర్ చేసే సమయంలో కేవలం కోకాకోలా బ్రాండ్ కూల్ డ్రింక్స్ మాత్రమే కొనేందుకు వీలు ఉంటుంది. పైగా ప్యాకేజ్ డీల్స్, మీల్ కాంబినేషన్లను కంపెనీ డిజైన్ చేస్తున్నట్లు తెలుస్తోంది. ఇది పరోక్షంగా రెస్టారెంట్లకు కోకాకోలాను దగ్గర చేస్తుంది. దేశవ్యాప్తంగా 5500 స్టారెంట్ భాగస్వాములను కలిగి ఉన్న థ్రైవ్.. స్విగ్గీ, జొమాటో లాంటి ఆటగాళ్ల కంటే కమిషన్ తక్కువగా వసూలు చేస్తోంది. పైగా ఆర్డర్‌లను పొందడానికి ప్లాట్‌ఫారమ్‌లో వారి స్వంత సబ్ పోర్టల్‌లను నిర్మించడానికి వారిని అనుమతిస్తుంది.

డొమినోస్ పిజ్జా ఆపరేటర్ జూబిలెంట్ ఫుడ్‌వర్క్స్ 2021లో థ్రైవ్‌లో 35% వాటాను దాదాపు రూ.24.75 కోట్లకు కొనుగోలు చేసింది. ఇది కంపెనీ అమ్మకాలను పెంచుకునేందుకు చేసిన వ్యూహాత్మక నిర్ణయంగా తెలుస్తోంది.