జొమాటో, మెక్‌డొనాల్డ్స్‌కు పెనాల్టీ.. తమ తప్పు లేదంటున్న ఫుడ్ డెలివరీ యాప్.. అసలేం జరిగిందంటే..

Fine on Zomato: ఆన్‌ లైన్‌ ఫుడ్ డెలివరీ ద్వారా జొమాటో.. ఇంటి వద్దకే ఆహారాన్ని చేరవేస్తూ మన జీవితంలో ఓ భాగమైపోయింది. అయితే కొన్ని విషయాల్లో కస్టమర్స్ ఆగ్రహానికి గురవుతోంది. కాగా మరికొందరు వినియోగదారులు అయితే కోర్టుకెక్కిన సందర్భాలూ ఉన్నాయి. తాజాగా ఇటువంటి సంఘటనే ఒకటి జరిగింది.

జోధ్‌పూర్‌లోని జిల్లా వినియోగదారుల వివాదాల పరిష్కార ఫోరమ్.. జొమాటోకు గట్టి షాక్ ఇచ్చింది. కంపెనీ మరియు రెస్టారెంట్ భాగస్వామి మెక్‌డొనాల్డ్స్‌పై లక్ష జరిమానా విధించింది. అయితే దీనిపై అప్పీల్ చేయనున్నట్లు జొమాటో తన రెగ్యులేటరీ ఫైలింగ్‌ లో తెలిపింది. ఆర్డర్ చేసిన శాఖాహారం స్థానంలో సదరు సంస్థ తప్పుగా మాంసాహారాన్ని పంపిణీ చేసినందుకు ఈ చర్యలు తీసుకున్నట్లు తెలుస్తోంది.

జరిమానా లక్షతోపాటు వ్యాజ్యానికి సంబంధించిన ఖర్చులు 5 వేలను ఇరు కంపెనీలూ భరించాల్సిందేనని జోధ్‌ పూర్ డిస్ట్రిక్ కన్స్యూమర్ డిస్ప్యూట్ రిడ్రెసల్ ఫోరమ్ ఆదేశించింది. అయితే జొమాటో ఇందుకు అంగీకరించే అవకాశం లేదని కంపెనీ ప్రతినిధి తెలిపారు.

ఈ ఆర్డర్ విషయంలో తమ తప్పేమీ లేదని జోమాటో వాదిస్తోంది. తాము కేవలం ఆహార విక్రేతకు ఫెసిలిటేటర్ మాత్రమేనని చెబుతోంది. సదరు రెస్టారెంట్ ఇందుకు పూర్తి బాధ్యత వహించాల్సి ఉంటుందని పేర్కొంది. సేవా లోపం, ఆర్డర్‌ లో వ్యత్యాసాలకు మాత్రమే తాము బాధ్యులమని జొమాటో స్పష్టం చేసింది.