health insurance: హెల్త్ ఇన్సూరెన్స్‌పై కన్స్యూమర్ కోర్టు కీలక తీర్పు.. బీమా కంపెనీల ఆటలు ఇక సాగవు!

viral judgement: అంతకంతకూ పెరుగుతూ పోతున్న వైద్య ఖర్చులను భరించడం సామాన్యులకు గుదిబండగా మారింది. ఈ పరిస్థితిని సమర్థవంతంగా ఎదుర్కొనేందుకు హెల్త్ ఇన్సూరెన్స్ ఉత్తమ మార్గం. అయితే ఈ బీమా మొత్తానికి లిమిట్ ఉంటుంది. దీనిపై వినియోగదారుల కోర్టు ఇచ్చిన తాజా తీర్పు సంచలనంగా మారింది.

వైద్య ఖర్చులపై ఇన్సూరెన్స్ కంపెనీ నిర్దేశించిన గరిష్ట పరిమితికి సంబంధించి వడోదరలోని జిల్లా వినియోగదారుల వివాదాల పరిష్కార కమిషన్ (DCDRC)
కీలక వ్యాఖ్యలు చేసింది. డాక్టర్, రోగి మరియు చికిత్స సమయంలో ఉపయోగించే మందులపై వైద్య ఖర్చులు ఆధారపడి ఉంటాయని గుర్తుచేసింది. ప్రతి శస్త్రచికిత్సకు ఖర్చు ఒకేలా ఉండదని, పరిమితి పేరు చెప్పి బీమా కంపెనీ క్లెయిమ్ ను తిరస్కరించరాదని పేర్కొంది.

ఫిర్యాదుదారు క్లెయిమ్ కంటే ఇన్సూరెన్స్ కంపెనీ తక్కువగా చెల్లించడాన్ని గమనించినట్లు గుర్తించింది. ఇటువంటి మోసపూరిత సేవాలోపంపై ఆగ్రహం వ్యక్తం చేసింది. ఈ మేరకు 17 వేల 368 తిరిగి చెల్లించాలని ఓరియంటల్ ఇన్సూరెన్స్ కంపెనీని వడోదర వినియోగదారుల కోర్టు ఆదేశించింది. అదనంగా ఫిర్యాదుదారుని మానసికంగా హింసించినందుకు పరిహారంగా మరో 3 వేలు ఇవ్వాలని స్పష్టం చేసింది.

2008లో ఓ వ్యక్తి తన కుటుంబం కోసం ఓరియంటల్ ఇన్సూరెన్స్ కంపెనీ నుంచి 'హ్యాపీ ఫ్యామిలీ ఫ్లోటర్ టైప్ మెడిక్లెయిమ్' పాలసీని కొనుగోలు చేశారు. దీని ప్రకారం 3 లక్షల పాలసీ క్లెయిమ్ ద్వారా కవర్ చేయబడింది. అనంతరం 43 వేలకు మరో క్లెయిమ్ చేయగా కంపెనీ 21 వేలు మాత్రమే ఇచ్చేందుకు సిద్ధమైంది. వ్యతిరేకించిన పాలసీదారు వినియోగదారల న్యాయస్థానాన్ని ఆశ్రయించడంతో తాజా తీర్పు వెలువడింది.