airindia: ఎయిర్‌ఇండియాపై కోర్టు ఆగ్రహం, ఫైన్‌.. 14 గంటల ప్రయాణం, 8 లక్షల ఖర్చు.. అయినా..

tata group news: బస్సు ప్రయాణాల్లో విరిగిపోయిన సీట్లను మనం చూస్తూనే ఉంటాం. వేలకు వేలు పెట్టి టిక్కెట్లు కొన్నా మంచి సీటు దక్కుతుందనే గ్యారెంటీ లేదు. తప్పదు కదా అని సర్దుకుపోయే వారు కొందరైతే పోరాడి సాధించుకునే వారు మరికొందరు. విమాన ప్రయాణంలో ఎదురైన చేదు అనుభవంపై ఓ జంట కోర్టుకు వెళ్లి విజయం సాధించారు.

న్యూయార్క్ నుంచి ఢిల్లీకి వెళ్లేందుకు ఓ దంపతులు ఎయిర్ ఇండియా విమానంలో టిక్కెట్స్ బుక్ చేసుకున్నారు. తీరా ప్రయాణ సమయంలో లోపభూయిష్టమైన బిజినెస్ క్లాస్ సీట్లు వారికి అలాట్ చేయబడ్డాయి. 8 లక్షలు చెల్లించినా కూడా తమకు అసౌకర్యం కలగడంతో తీవ్ర మానసిక వేదనకు గురయ్యారు.

ఈ వ్యవహారంపై ఆ జంట చండీఘడ్ లోని వినియోగదారుల కోర్టును ఆశ్రయించింది. ఇందుకు సాక్ష్యంగా వారి టిక్కెట్స్, వైద్య రికార్డులు, విరిగిపోయిన సీట్ల ఫోటోలు మరియు ఎయిర్‌లైన్‌తో జరిపిన ఉత్తర ప్రత్యుత్తరాలను సమర్పించారు. ఫిర్యాదుదారుల్లో ఒకరు వైకల్యంతో బాధ పడుతున్నట్లు తమ పిటిషన్‌లో వెల్లడించారు.

ఎయిర్‌లైన్స్ తీరుపై న్యాయస్థానం ఆగ్రహం వ్యక్తం చేసింది. వారికి పరిహారం కింద 50 వేలు, కోర్టు ఖర్చులకు గాను మరో 10 వేలు చెల్లించాలని ఎయిర్ ఇండియాను ఆదేశించింది. ఫిర్యాదు చేసినా పరిస్థితిని చక్కదిద్దడంలో విమానయాన సంస్థ విఫలమైనట్లు తేల్చింది. విరిగిన సీటు వల్ల ఫిర్యాదుదారుల కాళ్లు మరియు పాదాలలో వాపు కూడా వచ్చినట్లు గుర్తించింది. 14 గంటల పాటు తమ పాద రక్షణ కోసం బల్లను ఉపయోగించాల్సి రావడం పట్ల విచారం వ్యక్తం చేసింది.