LPG price: కమర్షియల్ సిలిండర్ ధర రూ.102 పెరుగుదల

కమర్షియల్ సిలిండర్ ధరలు నేడు భారీగా పెరిగాయి. ఒక్కో 19 కిలోల కమర్షియల్ సిలిండర్ పైన రూ.102.50 పెంచుతూ ఇంధన సంస్థలు ఆదివారం ప్రకటించాయి. దీంతో హైదరాబాద్‌లో కమర్షియల్ సిలిండర్ ధర రూ.2,562.50కి చేరుకుంది. దేశ రాజధాని ఢిల్లీలో ఈ ధర రూ.2355.50గా ఉంది. ఐదు కిలోల సిలిండర్ ధర రూ.655కి చేరుకుంది.

కమర్షియల్ సిలిండర్ ధరను గత నెలలోనే రూ.250 చొప్పున పెంచారు. ఇప్పుడు మరో రూ.102.50 చొప్పున బాదేశారు. మార్చిలోను సిలిండర్ పైన రూ.105కు పెంచారు. దీంతో చిరు వ్యాపారులు, హోటల్ యజమానులపై భారం పడింది. నెలకు ఐదు సిలిండర్లు వినియోగిస్తే రూ.3000 వరకు అదనంగా ఖర్చు చేయవలసి వస్తుంది.

అయితే గృహ అవసరాలకు వినియోగించే డొమెస్టిక్ సిలిండర్ ధరల్లో ఎలాంటి మార్పులేదు. చమురు సంస్థలు గత నెలలోను ఈ ధరల్లో ఎలాంటి మార్పు చేయలేదు. ప్రస్తుత ధరల ప్రకారం 14.2 కిలోల సిలిండర్ హైదరాబాద్‌లో రూ.1002, కోల్‌కతాలో రూ.976, చెన్నైలో రూ.965.50, ఢిల్లీలో 949.50, ముంబైలో రూ.949.50గా ఉంది.