15 రోజుల్లో 4 సార్లు పెరిగిన CNG ధరలు.. మీ జేబుకు నెలకు ఎంత చిల్లు పడుతుందో తెలుసా?

ఈ రోజుల్లో పెట్రోల్, డీజిల్ ధరలు మండిపోతుండటంతో చాలా మంది మిడిల్ క్లాస్ జనం డబ్బులు ఆదా చేసుకోవడానికి సీఎన్‌జీ (CNG) కార్ల వైపు మొగ్గు చూపుతున్నారు. కానీ, ఇప్పుడు ఇక్కడ కూడా సామాన్యుడికి ధరల షాక్ తగులుతోంది. దేశ రాజధాని ఢిల్లీలో తాజాగా సీఎన్‌జీ ధరను కిలోకు ₹2 చొప్పున పెంచారు. దీంతో అక్కడ కిలో సీఎన్‌జీ ధర ఏకంగా ₹83.09 కి చేరింది. కేవలం 15 రోజుల వ్యవధిలో ఈ రేట్లు పెరగడం ఇది నాలుగో సారి అంటే పరిస్థితి ఎంత దారుణంగా ఉందో అర్థం చేసుకోవచ్చు. మొన్న శనివారం ₹1 పెంచిన కంపెనీలు, మళ్లీ మంగళవారం నాటికి మరో ₹2 బాదేశాయి.

మే నెలలో జరిగిన ధరల బాదుడు ఇదీ!

ఈ మే (2026) నెలలోనే రెండు వారాల లోపు సీఎన్‌జీ (CNG) ధరలు నాలుగు సార్లు పెరిగాయి. ఢిల్లీ-ఎన్‌సీఆర్ పరిధిలో మొత్తంగా చూసుకుంటే ఈ నెలలోనే కిలోపై ఏకంగా ₹6 మేర భారం పడింది.

• మే 15న: కిలోకు ₹2 పెరిగింది
• మే 17న: కిలోకు ₹1 పెరిగింది
• మే 23న: కిలోకు ₹1 పెరిగింది
• మే 26న: కిలోకు ₹2 పెరిగింది

ఈ తాజా పెంపుతో ఇప్పుడు ఢిల్లీలో కిలో ₹83.09, నోయిడా , ఘజియాబాద్‌లలో ₹91.70, అలాగే ముంబైలో ₹84.00 గా ధరలు ఉన్నాయి.

మీ జేబుకు ఎంత చిల్లు పడుతుంది?

ఈ ధరల పెరుగుదల వల్ల మీ నెలవారీ బడ్జెట్ ఎంత మారుతుందో ఇప్పుడు చూద్దాం. సాధారణంగా 25 కిలోమీటర్ల మైలేజ్ ఇచ్చే ఒక స్టాండర్డ్ సీఎన్‌జీ (CNG) కార్ (వ్యాగన్ ఆర్ లేదా టాటా టియాగో లాంటివి) ఆధారంగా ఈ లెక్కలు చూస్తే..

• తక్కువ ప్రయాణం (నెలకు 1,000 కిమీ): వీరికి నెలకు ₹200, అంటే ఏడాదికి ₹2,400 అదనపు భారం పడుతుంది.
• సగటు ప్రయాణం (నెలకు 1,500 కిమీ): వీరికి నెలకు ₹300 చొప్పున, ఏడాదికి ₹3,600 ఎక్స్‌ట్రా ఖర్చవుతుంది.
• ఎక్కువ ప్రయాణం/క్యాబ్స్ (నెలకు 3,000 కిమీ): వీరికి నెలకు ₹600 చొప్పున, ఏడాదికి ఏకంగా ₹7,200 అదనంగా జేబులోంచి పోతాయి.

ఈ లెక్కన కేవలం ఈ మే నెలలో జరిగిన పెంపు వల్లే మీ రన్నింగ్ కాస్ట్ కిలోమీటరుకు సుమారు 20 పైసల వరకు పెరిగింది. ఒకవేళ మీరు ఈ ఏడాది ₹50,000 ఖర్చు పెట్టి కొత్తగా సీఎన్‌జీ కిట్ వేయించి ఉంటే, ఆ పెట్టిన పెట్టుబడి వెనక్కి రావడానికి (బ్రేక్ ఈవెన్) మరో 6 నుండి 12 నెలల అదనపు టైమ్ పడుతుంది.

అసలు ధరలు ఎందుకు పెరుగుతున్నాయి?

ప్రస్తుతం ప్రపంచవ్యాప్తంగా జరుగుతున్న భౌగోళిక రాజకీయ ఉద్రిక్తతలే దీనికి ముఖ్య కారణం. ముఖ్యంగా మిడిల్ ఈస్ట్ (మధ్య ప్రాచ్యం) దేశాల్లో గొడవలు, హార్ముజ్ జలసంధి వద్ద రవాణా అడ్డంకుల వల్ల అంతర్జాతీయంగా ఇంధన సరఫరా దెబ్బతింది. దీంతో మన దేశీయ గ్యాస్ కంపెనీలు విదేశాల నుండి ఎక్కువ రేటు పెట్టి ఎల్‌ఎన్‌జీ (LNG) ని దిగుమతి చేసుకోవాల్సి వస్తోంది. దీనికి తోడు డాలర్‌తో పోలిస్తే రూపాయి విలువ తగ్గడం కూడా మరో కారణం.

అయితే, ధరలు పెరిగినప్పటికీ పెట్రోల్, డీజిల్ కార్లతో పోలిస్తే సీఎన్‌జీ (CNG) బండ్లు ఇప్పటికీ 40% నుండి 45% వరకు రన్నింగ్ కాస్ట్‌ను మిగులుస్తున్నాయి. ఎందుకంటే అదే టైమ్‌లో పెట్రోల్ రేట్లు కూడా లీటరుకు దాదాపు ₹7.5 వరకు పెరిగాయి. ఎక్కువ దూరం ప్రయాణించే వారికి సీఎన్‌జీ ఇప్పటికీ బెస్ట్ ఆప్షనే అయినప్పటికీ, మునుపటి అంత భారీగా డబ్బులు మిగలకపోవచ్చు అని నిపుణులు చెప్తున్నారు.